Кеча, фаол депутат Расул Кушербаев учун оғир кун бўлди. Хусусан, Давлат солиқ қўмитаси Расул Кушербаевни солиқ органларига 4,6 млрд. сўм миқдорида зарар етказганликда айблаб, уни судга берди. Шунингдек, кеча бўлиб ўтган Қонунчилик палатаси ялпи мажлисида давлат ҳокимияти органларининг ноқонуний қурилишларни бузиш бўйича қарорларини судга беришда давлат божини тўлаш ёки тўламаслик борасида депутат Алишер Қодиров билан кескин баҳс бўлган ва Қодиров ҳамкасбининг кескин сўзлари учун Одоб комиссиясига мурожаат қилган. Бироқ, энди "Миллий тикланиш" раҳбари бу мурожаатини қайтариб олиб, Кушербаевни қўллаб-қувватламоқчи.
"Бугунги ялпи мажлисда мен билан Расул Кушербаев ўртасида бўлиб ўтган тортишув жуда ҳам нормал ҳолат.
Тортишув мавзуси давлат ҳокимияти органларини ноқонуний қурилишларни бузиш бўйича қарорларини судга беришда давлат божини тўлаш ёки тўламаслик хақида эди. Менга қолса судга мурожаат учун умуман тўловларни ҳар қандай шакли бекор қилиниши керак, адолатни излаш тортишувлари фақат ва фақат судда бўлсин. Суд ҳамма учун осон очиладиган эшик бўлсин. Расул эса бу норма ҳокимиятларни ноқонуний бузиш ишларини янада рағбатлантиради деган хулосада. Тортишув шу нуқтада бўлди.
Давлат Солиқ қўмитаси билан Расул ўртасидаги низодан хабарим йўқ эди, асабий бўлишга асоси бор. Бизни тортишувимиздаги кескин сўзлари учун мен ҳам Одоб комиссиясига мурожаат қилганим рост. Лекин бу чақирувимни қайтиб оламан. Қийин пайтда Расулни қўллаб қувватлаймиз. Ҳамкасбимизни судга жалб қилинишига розилик бермоқчи эмасмиз.
Бугун Ҳукуматни ҳисоботини эшитдик. Мураккаб шароитда Ҳукумат ҳам ноанъанавий ишлашни ўрганаяпди. Парламент ҳам эркин муҳитда ишлашни энди ўрганаяпди. Қўполроқ гапиргани учун Парламент аъзосини жавобгарликка тортилиши демократик ислоҳотларимизнинг руҳига мос эмас.
Қанча тортишсак ҳам мақсадимиз битта - Ўзбекистонимиз ривожланиши керак!" - дея ёзиб қолдирган Алишер Қодиров.
