Олий суд Матбуот хизмати фирибгарлик билан пул топишни касб қилган аёллар ҳақида хабар қилди.
Қизилтепалик Гулҳаё Бузрукова (исми-шарифлар ўзгартирилди) дугонаси Комила Жамиловага Ҳумоюн исмли йигит билан таништириб қўйишга ваъда беради. Тенгқур дугоналари турмуш қуриб кетаётгани боис Комила ҳам бунга қаршилик қилмайди. Шундан сўнг «Ҳумоюн» Камолага қўнғироқ қилади.
Улар қарийб икки ой мобайнида ғойибона «ишқий» муносабатда бўлишади.
Охир-оқибат иш шу даражага бориб етадики, кунларнинг бирида «Ҳумоюн» «суюклиси»нинг яланғоч суратини «Телеграм» ижтимоий тармоғидаги манзилига юборишни сўрайди. У буни бўлажак «умр йўлдоши» танасидаги кичиккина нуқсон ҳам келгусидаги оилавий турмушга рахна солиши мумкинлиги ва бу ҳол юз бермаслиги учун унинг соғломлигини ўз кўзи билан кўриб, кейин уйланиш истаги билан изоҳлайди. Эс-ҳушидан айрилган Комила унинг талабини бироз оғриниб қабул қилган бўлса-да, жисми нуқсондан холи эканини исботлаш учун бунга розилик билдиради. Аммо шундан сўнг воқеалар ривожи бошқача тус олади. Аниқроғи, Гулҳаё Комилани маиший бузуқликда айблай бошлайди. У Комиланинг «Ҳумоюн»га жўнатган суратини ота-онаси, яқинлари кўриб қолса, унинг оқибати ниҳоятда ёмон бўлиши ҳақида огоҳлантиради. Комила Гулҳаёга ялиниб-ёлвориб, сурат билан боғлиқ сирни ҳеч кимга ошкор этмасликни илтимос қилади.
Бундай оҳангдаги ўтинчлардан сўнг Гулҳаё шаштидан тушади. Бироқ ўртага анча оғир шарт қўяди. У сир сирлигича қолиши учун Комиладан 3 700 АҚШ доллари ва 20 миллион сўмлик тилла тақинчоқларни талаб қилади. Комила шаънини сақлаш учун Гулҳаёнинг шартига рози бўлади. Лекин талаб қилинган миқдордаги пул ва ота-онаси қўлида сақланаётган тақинчоқларини Гулҳаёга беришнинг иложини тополмайди. Аммо кейинчалик Гулҳаёнинг қистовлари жонидан ўтгач, Комила кеч бўлса-да, ўзини қўлга олади.
Бошидан кечирган воқеаларни ўз яқинларига маълум қилгач, уларнинг маслаҳати билан ҳуқуқни ҳимоя қилувчи идорага мурожаат этади. Тезкор тадбир режасига асосан Гулҳаё Комиладан 200 АҚШ долларини олганда қўлга олинди. Тергов чоғида Гулҳаёнинг макри фош этилди. Маълум бўлишича, Гулҳаё замонавий алоқа технологияси ёрдамида ғаразли мақсадни амалга оширмоқчи бўлган экан. Аслида у Комилага мобил қўл телефони ёрдамида овозни ўзгартирган ҳолда ўзини «Ҳумоюн» сифатида таништирган. Комила эса, бундай макр тузоғига дарҳол илинган. Ҳаётда ҳеч қандай «Ҳумоюн» деган йигит бўлмаган.
Шу каби яна бир фирибгарлик ҳолати фош этилди.
Жиззахлик Гулмира Суярова ҳам ҳийла-макр йўли билан мўмай даромад топмоқчи бўлди. У икки йил муқаддам бухоролик Аҳрор Рашидов (исм-шарифлар ўзгартирилган) билан пинҳона ишқий муносабатларга киришди.
Гулмира оиласидан ажрашгач, Аҳрорнинг таклифига биноан Бухоро шаҳридаги ижара уйида яшай бошлади. Оилали Аҳрор унга мўмайгина пул бериб турса-да, бу Гулмирани қаноатлантирмади. У Аҳрорга «ишқий муноасбатлар чоғида касаллик орттиргани»ни маълум қилиб, уни даволаш учун катта миқдорда пул сўради. Аммо Аҳрор бунча пулни беролмаслигини айтгач, орадаги сирни унинг оила аъзоларига ошкор этиши билан таҳдид қилди. Собиқ «суюклиси»нинг бундай таҳдидли иддаоларидан безган Аҳрор ҳуқуқни муҳофаза қилувчи идорага Гулмиранинг товламачилиги юзасидан ариза ёзди. Шунга асосан Гулмира Аҳрордан 3 миллион сўмни олаётганда қўлга олинди.
Тергов ва суд муҳокамасида макр ёрдамида мўмай даромад олишни кўзлаган аёлларнинг жиноий кирдикорлари тўлиқ фош этилди.
Суд товламачилик жиноятини содир этган Гулҳаё Бузрукованининг айбини Жиноят кодексининг 165-моддаси 2-қисми «б» банди, Гулмира Суярованинг қилмишини мазкур модданинг 1-қисми билан малакалади. Гулҳаё Бузрукова 3 йил муддатга озодликдан маҳрум қилинди. Г. Суяровага эса, 3 йил муддатга озодликни чеклаш жазоси тайинланди.
Шу тариқа ақлини ёвуз мақсадга хизмат қилдирган кимсалар қилмишига яраша қонуний жазоланди. Улар ўзлари қазиган чоҳга қулашди.
