Улуғнор туманида қуёнчилик учун ажратилган кредитни талон-торож қилган корхона раҳбари ва бошқаларга нисбатан жиноят иши қўзғатилди. Бу ҳақда Прокуратура ҳузуридаги Департамент маълум қилди.
Бош прокуратура ҳузуридаги Департаментнинг Улуғнор туман бўлими томонидан “Микрокредитбанк” АТБ Андижон вилояти филиалининг мурожаатига асосан ўтказилган терговга қадар текширувда, “U.” ИЧК раҳбари А.Р. ва бошқалар кооператив қуёнчилик фаолияти билан шуғулланмасада, махсус жамғарма ҳисобидан қуён ва қуён қафаслари сотиб олиш учун 500 млн сўм имтиёзли кредит ажратиш бўйича шартнома тузиб, шундан 200 млн сўмини дастлабки мониторинг хулосасини сохталаштириш орқали олишга эришиб, кредит маблағини талон-торож қилганликлари аниқланган.
Мазкур ҳолат юзасидан Жиноят кодексининг 167-моддаси (талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
