Олий Мажлис Қонунчилик палатасининг маълум қилишича, “Виждон эркинлиги ва диний ташкилотлар тўғрисида”ги қонун янги таҳрирда қабул қилинди.
Лойиҳада диний ташкилотни рўйхатга олиш учун мурожаат – у олинган кундан эътиборан бир ой муддат ичида, диний ташкилотни қайта рўйхатдан ўтказиш учун мурожаат – у олинган кундан эътиборан ўн беш кунлик муддат ичида кўриб чиқилиши белгиланмоқда. Бундан ташқари, амалдаги қонунда диний ташкилотни рўйхатга олишни рад этиш ҳаволаки норма асосида белгиланган бўлса, янги қонунда рўйхатга олишни рад этиш асослари аниқ санаб ўтилган.
Депутатларнинг таъкидлашича, қонун лойиҳасининг қабул қилиниши виждон эркинлиги ва диний ташкилотлар соҳасидаги муносабатларни тартибга солинишини янада такомиллаштиришга, диний ташкилотларни тузиш ва уларни давлат рўйхатидан ўтказиш, қайта рўйхатдан ўтказиш бўйича нормаларни соддалаштиришга, диний ташкилотларнинг ҳуқуқ ва бурчлари билан боғлиқ муносабатларни тартибга солувчи ҳуқуқий асосларнинг аниқ белгилаб қўйилишига хизмат қилади.
Қонун Сенатда маъқулланиб, президент томонидан имзоланиб, расман эълон қилингач кучга киради.
