«Рома» янги бош мураббийи Жозе Моуриньо ёзги трансфер ойнасида жамоада қандай ўзгаришларга қўл урмоқчи эканлиги маълум бўлди.
Corriere dello Sport’нинг ёзишича, португалиялик мутахассис энг аввало дарвоза чизиғини кучайтиришни истамоқда. Антонио Мирантенинг шартномаси ёзда тугайди, Пау Лопесга эса Моуриньо ишонч билдирмаяпти. Клуб раҳбарияти янги мураббийга А Серияда тўп сураётган дарвозабонлардан – Хуан Муссо («Удинезе»), Пьерлуиджи Голлини («Аталанта»), Алессио Краньо («Кальяри») ва Алекс Мерет («Наполи») сингари голкиперлардан бирини танлаш имкониятини тақдим этган.
Моуриньо марказий ҳимоя чизиғи ва яримҳимояга «Тоттенҳэм»даги собиқ шогирдлари Эрик Дайер ва Пьер-Эмиль Хёйбергни таклиф этишни истамоқда. Шунингдек, ижарада бўлган Женгиз Ундер («Лестер») ва Жастин Клюйвертга («РБ Лейпциг») ҳам имконият бермоқчи. Португалиялик мураббий «МЮ»да ўйин амалиётисиз қолаётган собиқ шогирди 33 ёшли Хуан Матани ҳам Римга чақиришни режалаштирган.
Ҳужум чизиғидаги асосий мақсад сифатида «Торино» форварди Андреа Белотти кўрилмоқда. Туринликлар билан шартномаси 2022 йилда якунига етадиган 27 ёшли италиялик ҳужумчи ҳам Рим жамоасига ўтишга қарши эмас.
Эслатиб ўтамиз, Жозе Моуриньо янги мавсумдан бошлаб Римда фаолият бошлайди. «Рома» португалиялик мутахассис билан 2024 йилга қадар шартнома имзолангани ҳақида хабар берган эдик.
