2021 йилнинг 28 февралида Россия Федерацияси Пенза шаҳрида андижонлик фуқаро М.Б 3 ёшли фарзанди С.Н.ни қаровсиз қолмаслиги учун ишхонасига бирга олиб боради. Шу куни М.Б.нинг ишхонасида газ баллони портлаши оқибатида она-бола турли даражадаги куйиш жароҳатини олади ва шифохонага ётқизилган.
Фуқаронинг яқинлари Ташқи меҳнат миграцияси агентлигига ёрдам сўраб мурожаат қилди, дея хабар қилмоқда Агентлик Ахборот хизмати.
Агентлик томонидан зарур чора-тадбирлар кўрилиши натижасида:
- иш берувчидан 150 минг рубль миқдорида компенсация ундириб берилди;
- оилавий аҳволи инобатга олиниб, Андижон вилояти ҳокимияти томонидан 15 миллион сўм моддий ёрдам пули ажратилди;
- тиббий хизмат сифатини яхшилаш мақсадида Ўзбекистоннинг Россиядаги Бош консулхонаси билан биргаликда Пенза вилояти губернатори билан музокаралар олиб борилиб, 17 март куни махсус вертолёт ёрдамида Нижний Новгород шаҳридаги куйиш марказига кўчирилди;
-фуқарога етказилган зарарни суғурта компанияси ва иш берувчидан ундириш мақсадида “Правовой советник” МЧЖдан адвокат ёлланиб, ҳуқуқий чоралар кўрилмоқда;
М.Б.нинг фарзанди саломатлиги барқарорлашгани сабабли бугун, 18 май куни Халқаро миграция ташкилоти билан ҳамкорликда яқин қариндоши ҳамроҳлигида Ватанга қайтарилди.
Айни пайтда М.Б. ҳомийлар кўмагида Нижний Новгород шаҳридаги махсус шифохонада даволанмоқда.
