Жиноят ишлари бўйича Олмазор туман судининг судьялари томонидан жиноятчиликни жиловлаш, жиноятчилик профилактикасини янада такомиллаштиришга бағишланган йиғилиш ва сайёр суд мажлиси ўтказилди. Бу ҳақда Тошкент шаҳар судининг Жамоатчилик ва ОАВ билан ҳамкорлик бўйича бош консультанти Садоқат Аллаберганова хабар қилди...
Олмазор туман ҳудудида яшовчи муқаддам судланганлар, туман ИИО ФМБ Пробация бўлими ҳисобида жазо муддатини ўтаётган маҳкумлар, маъмурий назоратда ва профилактик ҳисобда турган шахслар билан жиноятчиликни олдини олишга бағишланган йиғилиш бўлиб ўтди.
Ички ишлар органлари фаолиятини мувофиқлаштириш бошқармаси биносида ўтган мазкур йиғилишда жиноят ишлари бўйича Олмазор туман судининг раиси З. Бобонов ҳамда туман судининг судьялари М. Абидов ва Ж. Нажимов томонидан туман ИИО ФМБ Пробация бўлими ҳисобида турган маҳкумларни жазодан муддатидан илгари шартли озод қилиш ҳамда жазони ўташ тартибини бузган маҳкумларни жазосини оғирроқ жазога алмаштиришга оид 4 та тақдимнома сайёр суд мажлисида кўриб чиқилди.
Зафар Бобонов, жиноят ишлари бўйича Олмазор туман суди раиси:
— 60 ёшли эркак 2012 йил 2 мартда ЖИБ Миробод туман суди томонидан ЖКнинг 28,246-моддаси 2-қисми, 28,273-моддаси 5-қисми ва 25,28,273-моддаси 5-қисми билан айбдор деб топилган. ЖКнинг 59-моддасига асосан, 18 йил муддатга озодликдан махрум қилиш жазоси тайинланган. 2019 йил 29 майда ЖИБ Олмалиқ шаҳар суди ажримига асосан ЖКнинг 74-моддасига кўра, ўталмай қолган 7 йил 3 ой 4 кун озодликдан махрум қилиш жазо муддати, шу муддатга ҳар ойлик иш ҳақидан 20 фоиздан давлат даромади ҳисобига ундирилган ҳолда ахлоқ тузатиш ишлари жазосига алмаштирилган.
ЖКнинг 75-моддасида ахлоқ тузатиш ишлари жазосига ҳукм қилинган шахслар жазони ўташ вақтида пенсия ёшига етган бўлсалар, жазони ўташдан озод қилинади, деб кўрсатилган. Шунга кўра, сайёр судда иши кўрилган 60 ёшли маҳкум ўталмай қолган 5 йил 6 ой 25 кун жазодан муддатидан илгари шартли озод қилинди.
Мирзиёд Абидов, жиноят ишлари бўйича Олмазор туман суди судьяси:
— 2015 йил 5 майда ЖИБ Шайхонтоҳур туман судининг ҳукмига кўра, 53 ёшли эркак ЖКнинг 266-моддаси 1-қисми ва 273-моддаси 3-қисми “а” банди билан айбдор деб топилиб, ЖКнинг 60, 61-моддасига асосан 7 йил 3 ой муддатга озодликдан маҳрум қилинган. 2018 йил 12 ноябрда ЖИБ Олмалиқ шаҳар судининг ажримига кўра, ЖКнинг 74-моддаси 3-қисми “в” бандига асосан ўталмаган 3 йил 6 ой 21 кун озодликдан маҳрум қилиш жазоси шу муддатга ҳар ойлик иш ҳақидан 20 фоизи давлат даромади ҳисобига ундирилган ҳолда ахлоқ тузатш ишлари жазосига алмаштирилган.
Ҳозирда маҳкум аҳлоқ тузатиш ишлари жасини 2 йил 5 ойини ўтаган. ЖКнинг 73-моддасига асосан ахлоқ тузатиш ишлари жасини 3/2 қисмини ўтаганини инобатга олиб, ўталмай қолган 1 йил 1 ой 21 кунлик жазодан муддатидан аввал шартли озод қилинди.
Шунингдек, ва 2020 йил 19 мартда ЖИБ Чилонзор туман судининг ҳукмига кўра, ЖКнинг 109-моддаси 2-қисми, 277-моддаси 3-қисми “г” банди билан 3 йил озодликни чеклаш жазоси тайинланган 31 ёшли маҳкум ҳам муддатидан илгари шартли озод қилинди.
