Халқаро рейтинг ва индекслар билан ишлаш бўйича республика кенгашининг йиғилиши бўлиб ўтди
Унда шу йилнинг ўтган даврида ижтимоий-иқтисодий ҳамда сиёсий-ҳуқуқий соҳадаги қатор халқаро рейтингларда Ўзбекистоннинг ўрни яхшилангани таъкидланди.
Жаҳон банкининг Статистик салоҳият индексида Ўзбекистон 16 поғонага, Демократия индексида эса 2 поғонага кўтарилган. Глобал инновацион индексда Ўзбекистон 2015 йилга нисбатан ўрнини 29 поғонага яхшилаб, Марказий ва Жанубий Осиё давлатлари орасида 4-ўринни қайд этди.
«Аёллар, бизнес ва қонун индекси»да Ўзбекистон хотин-қизлар ҳуқуқлари ва гендер тенглик бўйича аҳамиятга молик ислоҳотларни амалга оширган 27 та давлат қаторига киритилиб, 5 поғонага юқорилаб, 190 та давлат орасидан 134-ўринни эгаллаган.
Йиғилишда халқаро рейтинг ва индекслар бўйича самарадорлик кўрсаткичларига (KPI) эришиш учун амалга оширилган чора-тадбирлар тўғрисида Кенгаш аъзоси — АОКА директорининг биринчи ўринбосари Дилшод Саиджановнинг ахбороти эшитилди.
