Италиянинг Пезаро шаҳрида бадиий гимнастика бўйича Токио-2020 Олимпия ўйинларига лицензиялар тақдим этувчи йилнинг сўнгги мусобақаси – Жаҳон кубоги босқичи ўтказилмоқда. Унда иштирок этаётган ҳамюртимиз Сабина Тошкенбоева узоқ давом этган Олимпия ўйинларига саралаш циклини муваффақиятли якунлади ва Токио-2020 йўлланмасини қўлга киритди. Бу ҳақда Туризм ва спорт вазирлиги хабар берди.
Пезарода Токио-2020 олимпиадасининг шахсий биринчилигида иштирок этадиган уч нафар спортчи саралаб олинди. Ғолиблар Жаҳон кубогининг тўртта босқичи, яъни София (Болгария), Тошкент (Ўзбекистон), Боку (Озарбайжон) ҳамда Пезаро (Италия) шаҳарларида ўтказилган мусобақаларда қайд этилган умумий натижаларга кўра аниқланди.
Сабина Тошкенбоева якунда 130 очко тўплади ва бу натижа унга XXXII ёзги Олимпия ўйинларида қатнашиш ҳуқуқини тақдим этди.
