АОКАда 2 июнь, чоршанба куни Коронавирусга қарши курашиш штаби аъзоси Севара Убайдуллаева иштирокида бўлиб ўтган брифингда коронавирусга қарши вакцинанинг 2–3 марта олиниши унинг самарадорлиги билан боғлиқ ёки боғлиқ эмаслигига ойдинлик киритилди.
Севара Убайдуллаеванинг таъкидлашича, коронавирусга қарши вакциналардан «Спутник V» ва «Astra-Zeneca» 2-босқичли эмланиш билан инсон организмида юқори даражада иммунитет ҳосил қилинишига ёрдам беради. Шу ўринда, «Спутник V» вакцинаси, унинг 2 босқич эмланиши учун 1- ва 2-компонентлари мавжуд бўлиб, ҳар бир эмланган одам махсус 1- ва 2-компонентни тўлиқ олиши билан организмида иммун ҳимоя ишлаб чиқиши мумкин.
Бундан ташқари, «ZF-UZ-VAC 2001» эса 3 босқичли эмланиш билан иммунитет ҳосил қилишга ёрдам беради. Тўлиқ 3-босқичда эмлангандан сўнг инсон организмида иммунитет ҳосил бўлишига эришиш мумкин.
«Шуни айтиш жоизки, вакциналар 2 ёки 3 босқичли бўлса-да, уларнинг барчасини сифати ва эмлашдан кейин ҳосил бўладиган иммунитет даражасига кўра самарадорлиги бир хил ва юқори даражада иммун ҳимоя ишлаб чиқилишига хисса қўшади», — деди штаб аъзоси.
