Спиртли ичимлик истеъмол қилиш ҳеч қачон яхшиликка олиб келмайди. Жиноятларга эътибор берадиган бўлсак, уларнинг аксарияти мастликда содир этилади.Бир немис олимидан ”Нима қилсак жиноятларнинг олди олинади?” деб сўрашганда “Сизлар менга спиртли ичимликлар ишлаб чиқаришни эллик фоизга камайтириб берсанглар, жиноятни ҳам эллик фоиз камайтириб бераман”,деб жавоб берган экан. Ҳа, афсуски, ичкилик сабаб содир бўлган ва бўлаётган жиноятлар, фожиалар оз эмас...
Жиноиий ҳаракатини охирига етказа олмади
Зафар Юсупов (исм-шарифлар ўзгартирилган) Тошкент шаҳар, Учтепа тумани, Чилонзор мавзесида, шериги Рустам Эшматов ва шаърий никоҳдаги турмуш ўртоғи Зоя Тарасовалар билан спиртли ичимлик истеъмол қилади. Маст ҳолатда бўлиб, ўзаро суҳбат давомида Рустам Эшматов унинг шаърий никоҳдаги турмуш ўртоғи Зоя Тарасовага жинсий алоқада бўлишни таклиф қилиши негизида жанжаллашиб қолишади. Ўзи ва хотинини ҳақорат қилгани учун Рустам Эшматовни қасддан ўлдириш учун уйдан олиб чиққан ошхона пичоғи билан ҳамла қилади ва қорин қисмига жароҳат етказади. Рустам Эшматов қаршилик кўрсатади, Зафар Юсуповни итариб юбориб, воқеа жойидан қочиб кетганлиги натижасида, у жиноий ҳаракатларини ўзига боғлиқ бўлмаган ҳолда охирига етказа олмайди.
“Қиз топиб бер, деди...”
Суд мажлисида сўроқ қилинган судланувчи Зафар Юсупов айбига қисман иқрор бўлиб,қуйидагиларни маълум қилди:
- Ўша куни уйда шаръий турмуш ўртоғим Зоя билан бирга “Кукси” тайёрладик. Уйда хотинимнинг акаси Ваня ҳам бор эди. Кейин Зоя билан билан спиртли ичимлик сотиб олиш мақсадида кўчага чиқдик. Газакни кесиш учун ўзим билан ошхона пичоғини ҳам олдим. Аввал колбаса, кейин икки дона бир ярим литрлик “Қибрай” пивосини харид қилдик. Уйга қайтаётганимизда илгари мутлақо таниш бўлмаган Рустам Эшматов олдимизга келиб, биргаликда ичишни таклиф қилди. Унинг қўлида ҳам бир баклажка пиво бор эди. Биз рози бўлдик, бирга танишим Костянинг болалар боғчаси ёнида жойлашган гаражига бориб, пиво ичдик. Костя мендан Рустамнинг кимлигини сўради, танишим, деб жавоб бердим.Соат тунгги 22.00 гача гаражда ичиб ўтирдик. Костя “Кеч бўлди, тарқалишимиз керак. Кўчада ППС машинаси юрибди, ичаётганимизни кўриб қолишса, ёмон бўлади”, деди. Шундан кейин гараждан чиқиб, дўконга бордик. Яна пиво сотиб олдик. “Дом”лар олдидаги ўриндиқлардан бирига бориб жойлашдик. Қўлимдаги пичоқ билан колбасани кесдим. Рустам ҳам бир баклажка пиво олиб келиб, ёнимизга ўтирди. Яна биргаликда ичишни давом эттирдик. Рустам менга “Дам олиш учун қиз топиб бер” деди. Мен унақа танишларим йўқлигини айтдим. У эса “Агар танишинг бўлмаса, олдингдаги Зояни ўзим билан олиб кетаман”, деди. Унинг гапидан жаҳлим чиқиб, иккаламиз урушиб кетдик. Шунда орқа чўнтагимга солган пичоғимни чиқариб, икки марта қорнига урдим. Ҳозирда содир қилган жиноятимнинг оқибатини тушуниб етдим, қилмишимдан чин кўнгилдан пушаймонман. Жабрланувчи Рустам Эшматовнинг менга нисбатан даъвоси йўқлигини инобатга олиб, енгилроқ жазо беришингизни сўрайман.
Ҳаёт учун хавфли тан жароҳати етказилган
Суд-тиббиёт экспертизасининг хулосасида Рустам Эшматовга тан жароҳати пичоқ тиғи типидаги ўткир санчиб-кесувчи жисм таъсирида етказилганлиги ва ҳаёт учун хавфли бўлган “оғир” тан жароҳатлари тоифасига киришлиги кўрсатилган. Тошкент шаҳар Ҳокимлиги соғликни сақлаш Бош Бошқармаси руҳий касалликлар клиник шифохонасининг хулосасига кўра, судланувчи Зафар Юсупов руҳий асаб касалликлари билан оғримаслиги, жиноят содир қилган вақтида ва ҳозирда руҳий жиҳатдан соғломлиги, ўзининг ҳаракатларига тўлиқ жавоб бера олиши, мажбурий тартибда даволанишга муҳтож эмаслиги аниқланган.
Ҳукм ўқилди
Зафар Юсупов ЖКнинг 25,97-моддаси 1-қисмида назарда тутилган жиноятни содир этганликда айбли, деб топилди. Унга ЖКнинг 25,97-моддаси 1-қисми билан ЖКнинг 57-моддасини қўллаб, 7 йил озодликдан маҳрум қилиш жазоси тайинланди. Тайинланган жазони умумий тартибли колонияларда ўташлик белгиланди.
Тўлқин Тўрақулов, жиноят ишлари бўйича Учтепа туман суди судьяси,
Лола Шоимова журналист.
