Бу ҳақда 2021 йил 11 июнь куни Ўзбекистон Электрон оммавий ахборот воситалари миллий ассоциацияси томонидан "Ер ресурсларидан оқилона фойдаланиш, уни муҳофаза қилиш ва соҳада қонунийликни мустаҳкамлаш - долзарба вазифа" мавзусида Очиқ мулоқотда маълум қилинди.
Ўзбекистон Республикаси Президентининг “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида”ги Фармонига кўра, ер соҳасидаги ҳуқуқбузарликлар учун жавобгарлик кескин кучайтирилди.
Хусусан:
– ноқонуний эгалланган ерлар тўғрисида хабар бермаслик, уларда қурилган иморатларни коммуникация тармоқларига улаб берганлик учун янги маъмурий жавобгарлик киритилди;
– суғориладиган ерларда ўзбошимчалик билан қурилиш қилган шахсларни тўғридан-тўғри жиноий жавобгарликка тортилади (амалда жавобгарлик маъмурийдан кейин белгиланган);
– ер соҳасида барча маъмурий жарималарни тайинлаш ваколатини кадастр органларига ўтказилади;
– ерни ноқонуний сотганлик учун янги жиноий жавобгарлик киритилди.
Хулоса қилиб айтганда, мазкур ўзгартиришлардан қуйидаги натижалар кутилмоқда.
– ерларни талон-тарож қилиш, ўзбошимчалик билан эгаллаш, ноқонуний сотиш кескин камаяди;
– ерлар барча учун бир хил ва шаффоф тартибда ажратилади;
– ер бозор активига айланади ва молиявий оборотга киради;
– ер ажратиш тартиби ягона ҳужжат – Ер кодексида белгиланади;
– ер соҳасида давлат ва жамоатчилик назоратининг самарадорлиги ортади.
