2021 йил 1 декабрдан суд мажлислари телеканаллар ҳамда Интернет тармоғи орқали жонли эфирга узатилади. Бу ҳақда АОКАда “Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида”ги президент фармони мазмун-моҳияти юзасидан ўтказилаётган матбуот анжуманидан Даракчи мухбири хабар бермоқда.
Маълум қилинишича, 2021 йил 1 декабрдан қуйидаги тадбирлар телеканаллар, шунингдек, интернет тармоғи орқали жонли эфирга узатилади:
- Қонунчилик палатаси ва Сенат мажлислари, Қорақалпоғистон Республикаси Жўқорғи Кенгеси, халқ депутатлари вилоят, туман, шаҳар кенгаши сессиялари (ёпиқ мажлислар бундан мустасно);
- тарафларнинг розилиги билан фуқаролар ҳуқуқ ва эркинликлари ҳамда жамоат тартибига тажовуз қилувчи, аҳоли соғлиғини сақлаш, экология, атроф-муҳитни муҳофаза қилиш ва табиатдан фойдаланиш соҳасидаги, шу жумладан давлат хизматчиларининг касбий фаолияти билан боғлиқ ҳуқуқбузарликларга оид ишлар, шунингдек, айрим оилавий низоларга оид фуқаролик ишлар бўйича суд мажлислари (ёпиқ суд мажлислари бундан мустасно).
Шунингдек, “Давлат ҳокимияти ва бошқаруви органлари фаолиятининг очиқлиги тўғрисида”ги янги қонун лойиҳаси концепцияси ишлаб чиқилади.
Ҳар йил якунлари бўйича давлат органлари ва ташкилотларининг очиқлик индекси аниқланади.
Фармонда кўрсатилган қоида ва тартибларнинг бузилиши давлат органлари ва ташкилотлари фаолиятининг очиқлиги тўғрисидаги қонунчилик бузилиши сифатида баҳоланади.
