Бугун, 28 июнь куни Олий Мажлис Қонунчилик палатасидаги ЎзЛиДеП фракциясининг навбатдаги йиғилиши бўлиб ўтди. Бу ҳақда партиянинг Ахборот хизмати маълум қилди.
Фракция йиғилишида “Ўзбекистон Республикасининг Жиноят кодексига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартишлар киритиш ҳақида”ги қонун лойиҳасининг муҳокамаси қизғин кечди.
Ушбу лойиҳа билан Жиноят кодексининг 219-моддаси биринчи қисми санкциясидаги жазо чоралари кучайтирилмоқда. Яъни, жарима миқдори базавий ҳисоблаш миқдорининг эллик бараваридан юз бараваригача оширилиб, бир йилдан уч йилгача озодликни чеклаш жазо чораси киритилмоқда ва озодликдан маҳрум қилиш жазоси бир йилдан уч йилгача кучайтирилиши назарда тутилмоқда.
Депутатларнинг фикрича, мазкур лойиҳанинг қабул қилиниши натижасида Жиноят кодексида ҳокимият вакилига қаршилик кўрсатганлик ёки унга нисбатан зўрлик ишлатганлик учун жавобгарликни белгилаш орқали ҳокимият вакилларининг ҳуқуқий ҳимояси таъминланади.
