Давлат божхона қўмитасининг хабар беришича, Наманган вилояти божхона бошқармаси ходимлари томонидан республика ҳудудигага автотранспорт воситаларини ноқонуний олиб киришга чек қўйилган.
Жумладан, Контрабандага қарши курашиш ва божхона аудити бўлими ходимлари томонидан ўтказилган тадбирда “Наманган” ташқи иқтисодий фаолият божхона постида фуқаро Р.А номига четдан келтирилган юк автомашинасини божхонада расмийлаштириш вақтида қинғирликка қўл урилгани аниқланган.
Гап шундаки, божхона органларига тақдим этилган ҳужжатларда ушбу техника 2017 йилда ишлаб чиқарилгани қайд этилган бўлса-да, аммо экспертиза натижаларига кўра бу тасдиғини топмаган. Ўрганишлар давомида маълум бўлишича, юк автомашинаси 2017 йилда эмас аслида 2016 йилда ишлаб чиқарилган экан.
Маълумотларни сохталаштириш орқали юк автомашина эгаси божхона тўловларидан қарийб 440 миллион сўм имтиёзларни қўлга киритмоқчи бўлганлиги аниқланган.
Ҳозирда ушбу ҳолат юзасидан суриштирув ҳаракатлари давом эттирилаётгани айтилмоқда.
