Бир неча кун аввал журналист Рустам Жабборов ижтимоий тармоқдаги шахсий саҳифаси орқали коронавирусга қарши эмлаш олган бўлса-да, айни пайтда унда COVID-19 аниқлангани ҳақида пост қўйган эди.
Унда маълум қилинишича, Жабборов ўтган йилнинг декабрь ойларида юртимизга олиб келинган илк вакциналарнинг синов жараёнида иштирок этган.
Ушбу хабардан сўнг, кўплаб фуқароларда коронавирусга қарши эмлаш олишнинг фойдаси йўқ экан-да, деган фикр пайдо бўлган бўлиши мумкин. Бироқ, мутахассисларнинг фикрича, вакцина олган инсонлар, коронавирусга чалинган тақдирда ҳам уларда касаллик жуда енгил ўтиши мумкин экан. Ушбу фикрлар нечоғлик тўғри эканини ва айни пайтда эмлашдан сўнг касалликни юқтирган журналистнинг аҳволи қандай экани билан қизиқиб, уларнинг ўзи билан боғландик.
"Бугун адашмасам, касалликнинг олтинчи куни. Шифокорлар тегишли муолажаларни тайинлашди. Касаллик енгил ўтаётгани учун уйда даволаняпман. Мутахассислар тез-тез аҳволимни суриштириб туришибди.
Шу ўринда бир нарсани айтиб ўтмоқчиман. Пост қолдиришдан мақсад одамларимизнинг вакцинага бўлган ишончини сўндириш эмас, аксинча, янада эҳтиёткор бўлишга чорлаш эди, холос. Аввало, мен тиббиётчи эмасман, вакциналарнинг хусусиятини ҳам тўла тушунтириб беролмасман. Қолаверса, вакцина олганимдан бери ярим йилга яқин вақт ўтди. Шу пайтгача унинг бирор бир ножўя таъсирини сезмадим. Касалликка чалинишим эса, бу аввало, тақдир... Вакцина олгандан кейин ҳам эҳтиёт чораларини кўриб, карантин қоидаларига изчил амал қилиш шарт экан. Кўпчилик шифокор дўстларим вакцина коронавирусдан сақланишнинг ҳозирча ягона йўли экани, у ҳатто касалликдан ҳимоя қилолмаган тақдирда ҳам унинг енгил ўтишини таъминлашини айтишмоқда.
Мен илгари коронавирусни анча бошқача тасаввур қилардим. Лекин у мен ўйлаганимдан кўра анча енгил ўтяпти. Енгилроқ йўтал, дастлабки кунлардаги озроқ ҳарорат, бўғимлардаги оғриқлар ортда қолди. Ҳид билмаяпман, холос. Шуларни айтмаса, соппа-соғман, деса ҳам бўлади. Бу ҳам вакцина туфайли бўлса керак. Шу боис, барча-барчадан илтимос қилардим! Вакцина олиш – шарт! Бутун дунё аҳолиси ҳозир фақат вакцинадан умид қилмоқда. Миллиардлаб инсонлар аллақачон турли вакциналар билан эмланишди. Бошқа чора йўқ! Эҳтимол бирор бир вакцина ҳозирча касалликдан юз фоиз ҳимоя қилолмас. Лекин, ҳеч бўлмаганда касалликнинг енгил ўтишини таъминлайди.
Ҳозир изоляциядаман. Бўш вақтимни китоб мутолааси, ул-бул қоралаш билан ўтказяпман. Ҳар ишда бир ҳикмат бор деб бежиз айтишмаган. Бир пайтлар “кўзим очлик қилиб” дўкондан сотиб олган, аммо шу пайтга қадар вақт тиғизлиги сабаб ўқилмай келаётган китобларга навбат етди", - дея ўз кечинмалари билан ўртоқлашди Рустам Жабборов.
