Пандемиянинг илк кунлариданоқ жамоатчиликнинг коронавирус инфекцияси билан боғлиқ саволларига ўз вақтида жавоб бериш, фуқароларга тиббий йўл-йўриқ кўрсатиш тизими йўлга қўйилган эди. Бир йил аввал ишга тушган қисқа рақамли 1003 Call-маркази ҳозирда ҳам туну кун фаолият кўрсатмоқда.
Ўтган йил касаллик авжига чиққан вақтда унда 200 нафардан ортиқ профессор ўқитувчилар, тажрибали шифокорлар уч сменада узлуксиз фуқароларнинг мурожаатларини қабул қилган эди. Шу йилнинг май-июнь ойларида марказда 15 нафар мутахассис қўнғироқларга жавоб берган бўлса, июлда мурожаатлар сони ошгани муносабати билан ой бошида 25 нафар, ҳозирда эса 50 нафар мутахассис навбатма-навбат туну кун уч сменада хизмат қилмоқда.
Уларнинг орасида тиббиёт фанлари номзоди ва докторлари, малакали мутахассислар бўлиб, фуқаролардан тушган саволларга тиббий асосланган жавоблар ва тавсиялар беришмоқда.
Маълумот учун, Call-марказга жорий йилнинг май ойида кунига ўртача 300 та қўнғироқ келиб тушган бўлса, июнь ойида бир кунда ўртача 200-400 нафар фуқаро мурожаат қилган. Июль ойига келиб эса, кунлик мурожаатлар сони ўртача 1800 тагача кўтарилган. Шундан, июлнинг биринчи ўн кунлигида ўртача мурожаатлар сони кунига 1450 тани, иккинчи ўн кунлигида эса — 2080 тани ташкил қилди.
Жумладан, 15-25 июль кунлари жами 23 436 та қўнғироқ келиб тушди, солиштириш учун: июнь ойининг ҳудди шу даврида 3711 нафар фуқаро қўнғироқ қилганди.
Энг кўп берилаётган саволларга эътибор берадиган бўлсак, бугун вируснинг қайси штаммлари юртимизда қайд этилган, улар клиникаси бўйича бир-биридан қандай фарқ қилади, болаларда уларнинг белгилари қандай намоён бўлмоқда, бир марта касалланган киши яна қайта вирусни юқтириши мумкинми каби қатор саволлар берилмоқда. Шунингдек, коронавирусга қарши эмлаш билан боғлиқ саволлар ҳам долзарб бўлиб турибди.
— Бундан ташқари, касалликнинг енгил шаклини бошидан ўтказаётган фуқаролар ҳам мурожаат қилиб, уй шароитида қандай даволаниш, қайси дори воситаларини қабул қилишлари кераклигини сўрашмоқда, — дейди Феруз Тожиев, Call-марказ мутахассиси. — Албатта, биз уларга дориларни тавсия эта олмаймиз. Шунинг учун бундай тавсия бера оладиган тиббиёт ходимларига, хусусан, оилавий поликлиникадаги шифокорларга мурожаат қилишлари кераклиги, у ерда эса беморга ҳолатига қараб дорилар тўплами берилишини айтамиз. Таъкидлаш лозимки, фуқароларнинг берган саволлари бир-бирини қайтармайди. Ҳар қайсисини алоҳида деталлар қизиқтиради. Мутахассисларимиз шунга мос тарзда, уларни қониқтирган ҳолда жавоб беришга ҳаракат қилмоқда.
Шунингдек, мурожаатчилар Тошкент шаҳар ва вилоятлардаги COVID-19 билан оғриган беморларни қабул қилаётган шифохоналарнинг манзили ва қайси тиббиёт муассасаларида бўш жой мавжудлигини ҳам сўрашмоқда.
Бир сўз билан айтганда, Call-марказ фуқароларни қийнаган саволларига вақтида жавоб бериш, уларга йўл-йўриқ кўрсатиш борасида ўз вазифасини бажариб, аҳоли оғирини енгил қилмоқда.
Эслатиб ўтамиз, бугунги кунда коронавирус инфекцияси, пневмония ёки ушбу касалликларга гумон қилинган ва бошқа юқумли хасталиклар билан касалланган беморларни даволаш мақсадида мамлакатимиз бўйича жами 82 та махсус шифохоналар фаолият юритмоқда.
Касаллик клиник белгиларсиз ва енгил кечаётганлиги сабабли уй шароитида даволанаётган беморлар саломатлиги назорати ва даволанишини ташкил этиш ҳамда уларга амбулатор ҳамда бемор уйига борган ҳолда хизмат кўрсатишни ташкил қилиш мақсадида 124 та ихтисослаштирилган махсус поликлиникалар фаолияти йўлга қўйилган. Уларда 222 та “мобил бригадалар” ташкил этилган.
