Компаниянинг маълум қилишича, айни пайтда барча мамлакатлар автомобил саноати яримўтказгичларнинг глобал танқислиги билан боғлиқ бўлган оғир даврларни бошдан кечирмоқда. Ҳатто микрочипларнинг кам ишлаб чиқарилиши натижасида бир қатор йирик автомобил заводлари тўлиқ ёпилган.
“UzAuto Motors” компанияси халқаро муаммоларни бартараф этишга эришган бўлишига қармасдан, ишлаб чиқариш ҳажми кескин тушиб кетган ва оқибатда янги автомобилларнинг етишмовчилиги кузатилмоқда.
Ушбу салбий оқибатлар мамлакатда автомобилларни сотиш ҳамда сотиб олишнинг ноқонуний йўлларини келтириб чиқарган.
Яқинда сотув тизими ёрдамида бир шахс томонидан автомобилларни сотиб олиш учун 10, 20 ва ҳаттоки, 200 та келишув шартномаларининг тузилганлик ҳолатлари аниқланган.
Ўрганишлар шуни кўрсатганки, бундай шахслар юзага келган ҳолатни ўз бизнесига айлантириб, навбатини кутишни хоҳламайдиган шахсларга ўз навбатини имтиёзли бериш мақсадида шартномалар тузишган.
"UzAuto Motors” ҳамда Ҳуқуқни муҳофаза қилувчи органлар мижозларнинг шахсий мурожаатлари ва шикоятларисиз на тезкор чора-тадбирлар кўриш, на жиноий иш бўйича тергов олиб бориш ҳуқуқига эга эмас.
Эслатиб ўтамиз, жорий йилда компаниянинг ишонч телефон рақамлари ва call-center хизматига "шапка"га оид бирорта ҳам шикоят келиб тушмади. Шунингдек, Ҳуқуқни муҳофаза қилиш органларига ҳам бундай мурожаат бўлмаган.
Ноқонуний битимлар тузишда қатнашган ҳар бир иштирокчи жиноий жавобгарликка тортилади. Ушбу ҳодиса ҳақида Ҳуқуқни муҳофаза қилувчи органларга ёки компаниянинг call-center хизматига хабар бериш ҳар бир фуқаронинг бурчидир", - дейилади маълумотда
“UzAuto Motors” компанияси янги автомобилларни сотиш ва сотиб олишнинг барча ноқонуний йўлларини олдини олиш учун савдо маълумотлар базасини Давлат йўл ҳаракати хавфсизлик хизмати инспекциясининг янги автомобилларни рўйхатдан ўтказиш базаси билан синхронлаштириш ташаббуси билан чиқди. Коррупцияга қарши курашиш агентлиги ва Давлат йўл ҳаракати хавфсизлиги хизмати ҳамда Ахборот технологиялари ва коммуникацияларни ривожлантириш вазирлиги кўмагидаги ҳамкорликни ўзида акс эттирган ушбу лойиҳа ўша ноқонуний бойиш тизими пайдо бўлишининг олдини олади ва автомобилни олишда навбатни беришнинг имконсизлигини таъминлайди.
" - Агар сиз автомобил сотиб олиш жараёнида тамагирлик ёки коррупциянинг бошқа турлари билан тўқнашсангиз, хусусан у ёки бу моделдаги автомобил учун шартноманинг йўқлиги кузатилса, Сиздан зудлик билан “UzAuto Motors” компанияси call-center марказининг телефони 78 141 – 77 -77 ёки Ўзбекистон Республикаси Бош прокуратурасининг 10-07 қисқа рақамларига қўнғироқ қилишингизни сўраб қоламиз", дейилади компания хабарида.
