Шавкат Мирзиёев олимларнинг тадқиқотига асосланиб коронавирус билан кураш ҳали яна камида 10 йил давом этишини маълум қилди. Бу ҳақда «Газета.uz » хабар бермоқда.
Шавкат Мирзиёев олимларнинг тадқиқотига асосланиб коронавирус билан кураш ҳали яна камида 10 йил давом этишини маълум қилди. Унинг сўзларига кўра, шу сабабдан «Спутник V» ва хитой-ўзбек вакциналарини Ўзбекистонда ишлаб чиқариш бўйича муҳокамалар бормоқда. Президент фуқароларни коронавирусга қарши эмланишга чақирди. «Вакцина олганларга шифохонадан 4 кунда чиқяпти, эмланмаганларга эса жуда оғир бўляпти», — деди у.
Ўзбекистон президенти Шавкат Мирзиёев чоршанба кунги видеоселектор йиғилишида мамлакатдаги эпидемиологик вазиятнинг ёмонлашганига тўхталди ва яна аҳолини коронавирусга қарши эмланишга чақирди.
Давлат раҳбарининг таъкидлашича, Ўзбекистон ҳар бир фуқаросининг ҳаёти учун курашишни давом эттиради ва бу учун керакли чораларни кўради.
Шавкат Мирзиёев яна бир маротаба фуқаролар ўз ҳаётлари ва саломатликлари учун масъул эканликларини эслатиб ўтди. Президент аҳолини яна коронавирусга қарши эмланишга чақирди ва 29 июль куни Ўзбекистон 3 миллион доза Moderna вакцинасини олишини таъкидлади. Олдинроқ хабар берилганидек, ушбу вакциналар АҚШ ҳукумати томонидан COVAX дастури доирасида беғараз ёрдам сифатида юборилмоқда.
«Вакцина олганлар шифохонадан 4 кунда чиқяпти, эмланмаганларга эса жуда оғир бўляпти. Ҳа, вакцинадан кейин касалланиш мумкин, лекин касаллик енгил формада кечяпти», — дея қайд этди у.
Давлат раҳбарининг маълум қилишича, Россия раҳбарияти билан Ўзбекистонда «Спутник V» вакцинасини қўшма ишлаб чиқариш бўйича музокаралар олиб борилмоқда. Шунингдек, ўзбек-хитой вакцинасини ҳам Ўзбекистонда ишлаб чиқариш бўйича ишлар қилинмоқда.
Унинг сўзларига кўра, Ўзбекистон томонидан ишлаб чиқарилган вакцина ЖССТ кўриб чиқиши учун юборилган. Президент ушбу вакцинани ишлаб чиқаришга катта маблағлар ажратилаётганлигини таъкидлади.
«Мен бугун эрталаб олимларнинг тадқиқотини ўқидим: биз бу касаллик билан ҳали камида 10 йил курашишимизга тўғри келади. Шунинг учун „Спутник V“ ва ўзбек-хитой вакцинасини ишлаб чиқаришни муҳокама қиляпмиз. Шунингдек, ўзимизнинг вакцинамизни ЖССТга юбордик. Бу учун катта пуллар ажратиляпти», — деди Шавкат Мирзиёев.
Президент аҳолининг 14 тоифасини мажбурий эмлаш чораларига ҳам изоҳ берди. Унинг сўзларига кўра, бу мажбурий чора.
