Ижтимоий тармоқларда “Аёллар хўрланди, эркакларга куч ишлатилди – Намангандаги “зўравон” ИИБ ходимларига жазо борми?” сарлавҳали видеохабар тарқалди. Ҳолат юзасидан Наманган вилояти ИИБ расмий муносабат билдирди.
Унга кўра, 30 июль куни соат 11:30 лар да Наманган шаҳар, “Шодлик” МФЙ, Тўрақўрғон кўчасида яшовчи М.И. яшаш хонадони ёнида қурилиш ишларини олиб бораётган фуқаро А.Б. билан жанжаллашиб қолганлиги сабабли ушбу жанжални тўхтатиш учун жалб этилган ҳудуд профилактика инспектори Б.Мўминов ва А.Хамраевларга қаршилик кўрсатиб, уларнинг эгнида бўлган хизмат кийимининг тугмаларини узиб ташлаган.
Воқеани бир тарафлама ёритишга уринган блогерлар ҳодиса жойида хизмат вазифасини бажараётган ходимларга қўпол қаршилик қилиб, тош ва бошқа буюмлар билан уларга таҳдид қилган ва оммани тўплаб жамоат тартибини бузган фуқаролар ҳақида ҳеч қандай маълумот бермаган.
Ҳозирда ҳолат юзасидан Наманган шаҳар прокуратураси томонидан тергов ҳаракатлари олиб борилмоқда.
Тергов жараёнларида жанжал кўтарган фуқаролар ва ИИБ ходимларнинг хатти-ҳаракатларига ҳуқуқий баҳо берилади.
