Аввал хабар қилганимиздек, "qalampir.uz" журналисти Феруза Нажмиддинованинг куни кеча “Tashkent City” ҳудудидаги ресторанлар Республика махсус комиссияси қарорини писанд қилмай, соат 20:00 дан кейин ҳам фаолият юритаётгани ҳақидаги танқидий материали ортидан уни обрўсизлантиришга қаратилган видеомонтаж тайёрланган. Ваколатли идора ва ташкилотлар ҳолатни ўз назоратига олди.
Айни пайтда ушбу ҳолатни кескин муҳокама қилаётган кенг жамоатчилик томонидан QALAMPIR.UZ журналисти Феруза Нажмиддиновани қўллаб-қувватлашга қаратилган “Мен Ферузаман” флешмоби бошланди. Жамиятда ўз сўзи ва мавқеига эга бўлган аёллар #мен_Ферузаман хештеги билан видео жойлаб, журналистларга, аёлларга нисбатан туҳмат, уларнинг шаънини топташга бўлган уринишларни қоралмоқда.
Ушбу оммалашиб бораётган флешмобга Миллий масс-медиани қўллаб-қувватлаш ва ривожлантириш жамоат фонди Васийлик Кенгаши раисининг ўринбосари, Гендер тенгликни таъминлаш масалалари бўйича комиссия аъзоси Саида Мирзиёева ҳам қўшилди. У журналист аёлларга Феруза билан боғлиқ жирканч воқеа асло шаштларини сўндирмаслигини, шантаж, бўҳтонлар уларни синдириб қўйишига йўл қўймаслигини сўраган.
