“Инсон бирон нарсани йўқотса, қайғурмаслиги керак. Фақат ниятни йўқотса, қайғуриши керак. Чунки, ҳар қандай хайрли иш, пок ният билан ижобат бўлади”. Токио-2020 Паралимпия ўйинларида ғолиб бўлган спортчиларимиз билан учрашувда Президент Шавкат Мирзиёев улуғ мутафаккир Ҳаким Термизийнинг шу фикрларидан иқтибос келтирди, дея хабар бермоқда “Даракчи” мухбири Сардорбек Раҳмонқулов.
Шунингдек, давлат раҳбари ҳозирги оғир пандемия шароитида Паралимпия ўйинларига муносиб тайёргарлик кўриш, бундай катта ютуқларга эришиш осон бўлмагани, мусобақанинг дастлабки кунларида Токио шаҳрида 25 нафар спортчимизга нисбатан қаттиқ карантин талаблари қўллангани ҳам жиддий муаммолар туғдиргани, ўз йўналишларида ғолибликка асосий даъвогар ҳисобланган Лобар Хуррамова, Севинч Салаева, Васила Алибоева сингари дзюдочи қизларимиз шундай сабаблар туфайли, баҳсларда иштирок эта олмагани ҳақида гапирди.
“Шу ўринда, бу галги мусобақаларда омади келмаган ёшларимизга қарата айтмоқчиман: жаҳондаги энг кучли спортчилар беллашган Паралимпия ўйинларида қатнашиб, ўз салоҳиятингизни дунёга намоён этганингизни ўзи ҳам катта ифтихордир. “Бугун бўлмадими, Парижда албатта бўлади!” – дея Шавкат Мирзиёев Париж-2024 Паралимпия ўйинларида уларнинг албатта ғалаба қозонишларига ишонч билдирди.
Маълумот учун:
Паралимпия мусобақаларига ҳар томонлама пухта тайёргарлик кўриш учун барча зарур шароитлар яратилган бўлиб, натижадавакилларимиз 8 та спорт тури бўйича 55 та йўлланмани қўлга киритиб, миллий спортимиз тарихида энг юқори кўрсаткичга эришишган. Вакилларимиз эшкак эшиш, каноэ ва таэквондо сингари 3 та йўналиш бўйича илк бор қатнашишди.
