21 октябрь – Ўзбек тили байрами кунини Японияда кенг нишонлаш мақсадида мамлакатимиз элчихонаси томонидан ўзбек тилини тарғиб этишга бағишланган челленж ташкил қилинди, деб хабар бермоқда «Дунё» АА мухбири.
Япон фуқаролари ушбу челленжда фаол иштирок этмоқда. Хусусан, Япониядаги Ўзбекистон Ёшлари жамиятининг фаол аъзоси Нисизава Сатору ушбу акцияга Алишер Навоий ғазалларидан намуна ўқиш билан қўшилди. Ўзбекистон элчихонаси ходимларининг фарзандлари ҳам челленжда фаоллик кўрсатмоқда. Улар Ўзбекистон қаҳрамони, Халқ шоири Эркин Воҳидовнинг «Ўзбегим» қасидасини айтиб берди.
Ўзбекистоннинг Япониядаги элчихонасидан маълум қилинишича, 11 октябрь куни Токио чет тиллар университетида Ўзбек тили байрами кунига бағишланган давра суҳбати ва 19 октябрь куни элчихонада фаол ватандошимиз Нодира Аминова томонидан япон тилига таржима қилинган «Зумрад ва Қиммат» эртагининг саҳналаштирилган намойиши режалаштирилмоқда.
Бундан ташқари, 21 октябрь – Ўзбек тили байрами кунига бағишланган бошқа қатор тадбирлар ва япон тилшунослари иштирокида онлайн-конференция ташкил этишга тайёргарлик кўрилмоқда.
