Айни пайтда президентликка қайта сайланган Шавкат Мирзиёев иштирокида Қишлоқ хўжалигида кластерлар фаолияти самарадорлигини ошириш чора-тадбирларига бағишланган видеоселектор йиғилиши бўлиб ўтмоқда. Президентлик сайловларидан кейинги биринчи видеоселектор йиғилишида давлат раҳбари сайлов жараёнларида иштирок этган ва меҳнат қилганларга ўз миннатдорчилик билдирди, дея хабар бермоқда “Даракчи” мухбири Сардорбек Раҳмонқулов.
“Фурсатдан фойдаланиб, менинг Ўзбекистон Республикаси Президенти этиб сайланишимга ўз ишончини билдирган ва самимий қўллаб-қувватлаган азиз юртдошларимга, кўпмиллатли бутун халқимизга яна бир бор ўзимнинг чексиз миннатдорчилигимни билдираман”, деди президент.
Шавкат Мирзиёев сайловларни миллий қонунчилигимиз ва умумэътироф этилган халқаро стандартларга тўла мос ҳолда, юқори савияда, очиқ-ошкора, демократик, соғлом рақобат ва кураш муҳитида ўтказишга катта ҳисса қўшган барча мутасадди ва фаоллар ва:
- Марказий сайлов комиссияси, округ ва участка сайлов комиссиялари, сайлов участкаларининг раҳбар ва аъзоларига, Миллий гвардия, Ички ишлар, Соғлиқни сақлаш вазирликлари, вилоят, шаҳар ва туман ҳокимликларига, алоҳида Қорақалпоғистон Республикаси аҳлига, барча ташкилот ва идоралар ходимларига;
- ўз табрик ва қутловларини йўллаётган мамлакатимиз жамоатчилигига, барча ватандошларга ҳам миннатдорчилик билдирди.
Шунингдек, давлат раҳбари муқобиллик асосида ўтган сайловда бошқа партиялардан кўрсатилган номзодларнинг келгуси фаолиятларига ҳам омад тилаб: “Биз куни кеча ўзаро рақобат қилган бўлсак, энди барча орзу-интилиш ва ҳаракатларимизни бирлаштириб, жонажон Ватанимиз равнақи йўлида фаол ҳамкорлик қиламиз”, дея қўшимча қилди.
Ўз маърузасини давом эттираркан, Шавкат Мирзиёев энди сайловолди учрашувларда илгари сурилган стратегик дастур – Янги Ўзбекистонни барпо этиш, халқимизнинг ҳаётини обод ва фаровон қилиш бўйича белгилаб олган мақсад ва вазифаларни жадал ва изчил амалга ошириш учун белни маҳкам боғлаб, илгаригидан ҳам ўн марта кўп меҳнат қилиш кераклигини таъкидлади.
