“Uzbekistan Airports” ижтимоий тармоқларда тарқалган Тошкент аэропортида тўпланган одамлар акс этган видео юзасидан изоҳ берди.
Компания берган хабарга кўра, “Uzbekistan Airways” рейси билан Тошкент — Истанбул йўналиши бўйича учмоқчи бўлган 200 га яқин киши аэропортга келган, аммо ушбу рейс жадвалда бўлмаган.
Йўловчилар чипталарни “Asia Luxe Travel” сайёҳлик компанияси орқали сотиб олишганини айтишган.
“Uzbekistan Airways” вакиллари сайёҳлик компанияси авиачипталар савдосини авиакомпания билан слотни келишилмаган ҳолда ташкил қилганини маълум қилишган.
Сайёҳлик компанияси йўловчиларга сув тарқатган ва уларни меҳмонхонага жўнатиш учун транспорт ташкил қилган. Бироқ одамлар терминал биносини тарк этишмаган.
Маълумотга кўра, айни дамда Ўзбекистон Транспорт вазирлиги ташаббуси билан захира ҳаво кемаси ажратилиб, ушбу йўловчиларни парвозга рўйхатга олиш бошланган.
