Самарқанд вилояти Ургут туманида яшовчи аёлнинг уйига тунда босқинчи кирди. У аёлнинг фарзандлари кўз-ўнгида унга ташланиб, танасининг турли қисмларига пичоқ санчади. Бу ҳақда Zamon.uz маълум қилди.
— Пичоқни уриб кетаверди. Мен ёрдам беринглар деб бақирганимда пичоқни оғзимга тиқиб йиртмоқчи эди. Мен қўлим билан пчоқни қайтарганим учун юзимга теккан. Кейин қўлтиқларимга теккан, кўксимга, орқамга теккан. Бир қўлимни ўзига 7 марта пичоқ теккан. Фарзандларим кўрди. Улар ҳам ҳозир қандайдир стресс ҳолатида — дейди жабрланувчи.
Жиноят содир этган кун босқинчи уйдаги электр энергиясини узиб қўяди. Аёл чироқ ўчгани боис болалари билан ҳовлига чиқади. Жиноятчи ниқоб тақиб олгани учун аввалига аёл уни танимайди. Кейинроқ эркакнинг ҳатти-ҳаракатларидан қўшниси эканини гумон қилади.
Жабрланувчининг тахмини тўғри чиқди:
— Бунга мен ёмонлик қилмагандим. Мени айбим нима эди, нима ҳаққи бор эди болаларимни бундай қилишга?
Тойлоқ тумани судида 42 ёшли босқинчининг жиноят иши кўриб чиқилди. У ўзи содир этган жиноят ҳақида қуйидагича гувоҳлик берди:
— Пичоқни урган вақтимни биламан. Ундан кейин нима бўлганини билмайман. Кейин уйга борганимдан кейин қонни кўриб ўзимни билмай қолдим.
Фуқаронинг жиноятига спиртли ичимлик сабаб бўлган.
Фуқарога суд томонидан 16 йилу 6 ой муддатли қамоқ жазоси тайинланди.
