Президент таълим муассасалари агентлиги томонидан 24-25 ноябрь кунлари ташкил этилаётган “Янги Ўзбекистон таълими: ислоҳотлар йўлида муваффақиятли ҳамкорлик” мавзусидаги халқаро таълим форумида иштирок этиш учун хориждан нуфузли меҳмонлар бирин-кетин етиб келишмоқда.
Улардан бири — ўз йўналиши бўйича дунё рейтингида 1-ўринда турадиган Массачусетс Технология институти J-Wel директори Вижай MS Кумар.
Доктор Кумарнинг тадқиқотлари ва фаолияти таълимда технологик инновацияларни режалаштириш ва жорий этишга қаратилган.
Доктор Кумардан юртимиз ҳақидаги илк таассуротлари ва режалари ҳақида сўзлади:
" - MIT ташкилоти бутун дунё бўйлаб таълимни ўзгартириш ва шакллантириш учун хизмат қилади. Ҳозирги дунё тез ўзгармоқда. Бугунги бозор ҳам, иқтисод ҳам кечагидан фарқ қилади. Бутун дунё бўйлаб таълимдан четда қолиб кетган инсонлар бор, ташкилотимиз уларни қўллаб-қувватлаш ҳамда таълим сиёсатини юксалтиришда иштирок этади.
Шунингдек, биз таълимга оид тадқиқотлар ва инновацияларни бўйича халқаро ҳамкорлар билан ишлаймиз. Шундай ҳамкорларимиздан бири "Янги Ўзбекистон" университетидир. Мен ўз ташрифимдан бағоятда хурсандман. Келганимга энди бир кун бўлди, шунда ҳам бир олам таассуротга эгаман. Масалан, мен бироз олдин Ал Хоразмий мактабида бўлдим. Менга бир ўқувчи бола гидлик қилди. Ана шу нарса - ўқувчиларнинг лойиҳалари ҳақиқатда таҳсинга сазовор. MIT айнан шундай ташаббусларни қўллаб-қувватлайди.Чунки, ўрганиш, бу амалда бажариш деганидир. Фақат назариянинг ўзи билан ҳеч нарсага эришиб бўлмайди.
Президент ташаббуси билан ташкил этилган "Янги Ўзбекистон" университети J-Wel ҳамкори ҳисобланади. Биз мазкур университет билан ўқув дастурларини ишлаб чиқишда ҳамкорлик қилиш ниятидамиз. Ҳозирда узоқ муддатли ҳамкорликни йўлга қўйиш истиқболларини муҳокама қилиняпти. "Янги Ўзбекистон" нафақат Ўзбекистон учун, балки дунёнинг бошқа ҳудудлари учун ҳам ўзига хос моделга айлана олади. Албатта, бу жуда катта жараёндир, инвестициялар киритилиши, инсон ресурслари, таълим инфраструктураси каби масалалар устида ишлаш керак.
Бу, таъбир жоиз бўлса, бизнинг қаршимизда турган энг вазифалардан. Биз шу тариқа минтақадаги таълимда катта ўзгаришни амалга ошириш ниятидамиз. Умуман олганда, мураккаб вазифалар учун бугунги илк қадамлар жуда чиройли бошланиш, деб ҳисоблайман" , - деди Вижай MS Кумар
