"Ўзбекистон 24" телеканалининг "Факт 24" кўрсатувида Ўзбекистонда жамоат транспортида йўловчилар учун яратилган яна бир қулайлик ҳақида хабар берилди.
Унга кўра, FacePay технологияси метронинг «Буюк Ипак йўли» бекатида синовдан ўтказилмоқда. Чипта харид қилмай метрога кириш имконидан фойдаланиш учун йўловчи ўз юзини сканерлаши ва уни транспорт ёки банк картаси маълумотлари билан бирга маълумотлар базасига киритиши лозим бўлади. Шундан сўнг йўловчи шунчаки валидаторга қараб йўл ҳақи учун тўлов қилиши мумкин.
Эслатиб ўтиш жоизки, жорий йилда йўловчилар учун талайгина қулайликлар яратилган эди. Жумладан, UZCARD, HUMO, VISA, MasterCard, UPI, MIR контактсиз банк карталари орқали тўлов амалга ошириш тизими жорий этилди. Шунингдек, NFC тўлов функцияси жорий этилди ва Android ва IOS учун АТТО мобил иловаси ишга туширилган.
Видеолавҳада маълум қилинишича, Гулистон ва Қарши шаҳрида ҳам нақд пулсиз тўлов тизими жорий этилган. 2022 йилда Самарқанд, Бухоро, Хоразм, Андижон, Фарғона ва Наманганда йўл ҳақини йиғишнинг автоматлаштирилган тизимини жорий этишни режалаштирилмоқда.
