Бугун Ахборот ва оммавий коммуникациялар агентлигида Соғлиқни сақлаш вазирлиги, Санитария-эпидемиологик осойишталик ва жамоат саломатлиги хизмати, Республикамизнинг ОИТСга қарши кураш марказлари вакиллари иштирокида матбуот анжумани бўлиб ўтди.
1 декабрь — Бутунжаҳон ОИТСга қарши кураш кунига бағишланган тадбирда ОИВ инфекцияси билан боғлиқ дунёдаги ва мамлакатимиздаги вазият, эпидемияга қарши олиб борилаётган профилактик тадбирлар тўғрисида батафсил маълумот берилди.
Жумладан, Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов анжуманда қуйидагиларни таъкидлаб ўтди:
— ОИТС глобал хатардир. БМТ Бош Ассамблеясининг 2016 йил июнь ойида бўлиб ўтган 70-сессиясида ушбу касалликка қарши курашни янада жадаллаштириш ва 2030 йилга қадар орттирилган иммунитет танқислиги синдроми эпидемиясини буткул тугатиш бўйича Декларация қабул қилинган.
Мазкур Декларацияда, агар тезкор, самарали чоралар кўрилмаса, баъзи Африка давлатларида, айниқса, ОИВ жадал ривожланиб, иқтисодий, ижтимоий ва ҳаттоки сиёсий инқирозни келтириб чиқариши мумкинлиги айтилган.
ОИВ инфекциясининг юқиш ёки юқмаслиги тиббий маданият ва саводхонликка боғлиқ. Аҳолининг саводхонлик даражаси қанча юқори бўлса, бу касалликнинг юқиш эҳтимоли ҳам шу қадар камаяди.
Шу боис, ҳар йили 1 декабрь санаси анъанавий равишда “Бутунжаҳон ОИТСга қарши кураш куни” сифатида нишонланади ва таълим муассасаларида ўқувчи-ёшлар ўртасида тушунтириш-тарғибот тадбирлари ташкил этилади.
Мамлакатимизда ЖССТ тавсияларига мувофиқ, ОИВ инфекцияси онадан болага юқишининг олдини олиш дастури жорий этилган. Унга кўра, ҳар йили юртимизда ўртача 600 минг нафар ҳомиладор аёлда ушбу вирус бор-йўқлиги текширилади.
Инфекцияли аёллардан туғилган чақалоқларга эса хасталик юқишининг олдини олиш мақсадида ретровирусга қарши дорилар ўз вақтида бериб борилади.
Анжуман сўнгида ОАВ вакилларининг саволларига мутахассислар томонидан жавоблар берилди.
