Келаси ҳафта бошида республика ҳудудларида нам, қорли нисбатан совуқ ҳаво кузатилиши кутилмоқда. Бу ҳақда Гидрометеорологик илмий таҳлиллар каналида хабар берилди.
Маълум қилдинишича, 12 декабрь куни дастлаб шимол, 13-14 декабрь кунлари республиканинг бошқа ҳудудларида яхшигина ёғингарчилик(асосан, қор)лар кутилади. Тоғларда қор бўронлар ва кўп миқдорда қор ёғиши мумкин.
12-13 декабрь кунлари катта масштабли нам ҳаво оқимлари, республика ҳудудларига бемалол кириб келиши учун вазият юзага келган. Оқимлар ғарб ва шимоли-ғарбдан кириб келаётгани боис, совуқ ва нам ҳаво оқимидир. 13-14 декабрь кунлари республика аҳолисининг катта қисми қиш манзарасига гувоҳ бўлиши мумкин. 14 декабрдан совуқ антициклон таъсири ҳудудларда сезилади. Шимол ҳудудларда ҳаво ҳарорати минимуми кечалари -15 даража совуқгача пасаяди.
Яқин кунларда Россиянинг шимоли, шимоли-ғарби ва шимоли-шарқида арктик совуқ ҳаво оқимлари ривожланиши прогнози берилмоқда. Ўзбекистонда бу декабрь ойи иккинчи ўн кунлиги иккинчи пентада(15-20 декабрь)сида ҳам республикада бироз паст ҳарорат кузатилишига олиб келиши мумкин, дейилади прогнозда.
