"Толибон» 2021 йил кузда Британиядан Тошкент орқали Афғонистонга келган 2 нафар ИШИД аъзосини қўлга олган. Бу ҳақда «The Guardian» хабар берди.
Маълум қилинишича, улардан бири сохта паспортга эга бўлган. «Толибон» манбаси сумкасида 10 000 фунт нақд пули, ҳарбий кийим, тунги кўзойнаги бўлган ИШИД аъзоларини чегарада қўлга олганини айтган.
«Уларнинг бирида Британия ва яна бирида Европа давлатларидан бирининг паспорти бўлган», — деган «Толибон» манбаси.
Шунингдек, манбада террорчилик гуруҳи аъзолари Ҳайратон чегарасидан ўтаётганда Жалолободдаги қариндошлариникига боришини айтгани маълум қилинган. Ўзбекистон манбасига кўра, иккала шахс ҳам Тошкентга учиб келганида Британия паспортидан фойдаланган. Расмийлар бу икки шахсни Афғонистон ҳукуматига текширувдан ўтказиш учун юборганини қўшимча қилган. Чунки улар разведка маълумотларига кўра хавотир уйғотган, бироқ Ўзбекистон қонунчилигини бузмаган, жумладан, Буюк Британия паспорти эгалари мамлакатга визасиз кириш ҳуқуқига эга, улар Интерпол қидирувида ҳам бўлмаган.
