Археолог-тарихчи олим, Ўзбекистон Республикаси Фанлар академияси академиги , ЎзРФА Санъатшунослик институтининг катта олими, тарих фанлари доктори Эдвард Ртвеладзе вафот этди. Бу ҳақда академия маълум қилди.
У 1942 йилда Грузиянинг Боржоми шаҳрида таваллуд топган. 1967 йилда тарихчи-археолог мутахассислиги бўйича Тошкент давлат университетини тамомлаган. Кейинчалик Москва шаҳрида докторлик диссертациясини ҳимоя қилган.
Маълумотларга кўра, Ртвеладзе Ўрта Осиё, Кавказ, Кипр, Япония ва Францияда олиб борилган 80 дан ортиқ илмий археологик экспедициялар иштирокчиси. Кўпгина археологик ёдгорликларни очган ва текширган.
Эдвард илмий фаолияти учун 1985 йилда "Беруний" номидаги Давлат мукофоти, 2001 йилда "Буюк хизматлари учун" ордени, 2003 йилда "Меҳнат шуҳрати" ва 2017 йилда "Эл-юрт ҳурмати" ордени, билан тақдирланган.
Қайд этилишича, шундай ютуқларга эришган олим 80 ёшида ёруғ оламни тарк этди.
Тарихчи-археолог Эдвард Ртвеладзе вафоти муносабати билан Ўзбекистон электрон оммавий ахборот воситалари миллий ассоциацияси (ЎзЭОАВМА) ва унга аъзо нодавлат телерадиостанциялар жамоалари ҳам чуқур ҳамдардлик билдирди.
