Тошкент шаҳридаги Ал-Хоразмий майдонини реконструкция қилиш ишчи лойиҳаси ва смета ҳужжатлари экспертизадан ўтказилди. Кейинги босқич — майдонда қурилиш ва ободонлаштириш ишларини амалга оширадиган пудратчи ташкилотни танлаш учун тендер ўтказишдан иборат. Бу ҳақда “Юксалиш” умуммиллий ҳаракати матбуот хизмати хабар берди.
Танлов иштирокчиларидан “математиклар боғи”нинг ландшафт дизайни концепциясини таклиф этиш сўралганди. Натижаларга кўра, “Insard Architects” архитектура бюроси ғолиб деб топилди ва уларга “Юксалиш” УМҲнинг 10 млн сўм миқдоридаги пул мукофоти тақдим этилди.
Концепцияда нафақат Ал-Хоразмийнинг меросини ва математикани оммалаштиришга, балки анъаналар билан замонавий тенденциялар ва технологияларнинг уйғунлашувига ҳам урғу берилган. Ландшафт дизайнида майдон ҳудудидаги дарахтларни ҳамда ўзига хос хусусиятларини сақлаб қолиш назарда тутилган. Спорт ва болалар майдончаларини, амфитеатр ва томошабинлар учун, интерфаол ва маърузалар учун ҳудудларни барпо этиш режалаштирилган.
Ал-Хоразмий майдонини қайта тиклашнинг дастлабки босқичини амалга ошириш учун маблағларнинг бир қисми (900 млн сўм) концепцияни openbudget.uz ташаббусли бюджетлаштириш платформасига жойлаштириш орқали олинди. Ушбу маблағлар қурилиш ишларининг буюртмачиси сифатида фаолият юритувчи ва барча зарур тартиб-қоидаларни амалга оширувчи Чилонзор тумани ҳокимлигининг ҳисоб рақамига келиб тушди. Лойиҳани, шунингдек, халқ депутатлари шаҳар Кенгашининг Чилонзор ва Учтепа туманларидан сайланган депутатлари ҳам қўллаб-қувватламоқда.
“Юксалиш” умуммиллий ҳаракати қошидаги “Шаҳарсозлиқ тўлқини” ташаббуси фаоллари пойтахт ҳокимлиги ҳузуридаги жамоатчилик кенгаши вакиллари билан биргаликда Ал-Хоразмий майдонини реконструкция қилишнинг барча босқичлари устидан жамоатчилик назоратини амалга оширади.
Эслатиб ўтамиз, 2021 йилнинг июнь ойида “Юксалиш” умуммиллий ҳаракати пойтахт ҳокимлиги ҳузуридаги жамоатчилик кенгаши ва Ўзбекистон экологик қурилиш кенгаши билан ҳамкорликда Чилонзор туманида жойлашган Ал-Хоразмий майдонини қайта тиклаш бўйича ёш архитектор-дизайнерлар учун танлов эълон қилганди. Мақсад — буюк алломанинг бутунжаҳон меросини ҳамда математика фанини оммалаштириш.
