Тошкент давлат техника университетидаги қурилишда ишлаган ёлланма ишчи маошини ололмаганлиги сабабли ўзини бешинчи қаватдан ташлашга уринди. Ҳодиса жойига етиб борган Олмазор ИИБ ФМБ бошлиғи музокара ўтказиб, 40 ёшдан ошган фуқарони пастга туширишга эришди.
15 февраль куни Ислом Каримов номидаги Тошкент давлат техника университетида эркак ўзини бешинчи қаватдан ташлашга уринди.
Таъкидланишича, интернет тармоқларидахх тарқалаётган хабарларда ўзини бешинчи қаватдан ташламоқчи бўлган эркак ушбу университет ходими сифатида кўрсатилган.
Бироқ, эркак университет ходими эмас, шу олий таълим масканидаги қурилишда ишлаган, 40 ёшдан ошган ёлланма ишчи эканлиги айтилмоқда. Эркак маошини ололмагани сабабли, ўз норозилигини шу тарзда намойиш этишга уринган.
Ҳодисадан хабар топган Олмазор туман ИИБ ФМБ бошлиғи Маҳкам Вафоев воқеа жойига бориб, эркак билан музокаралар ўтказган ва уни пастга тушишига ёрдамлашган.
