Жаҳонда пандемия тўлқинининг кескин пасайиш тенденцияси кузатилмоқда. Кетма-кет рекорд кўрсаткичлари янгиланаётган қатор давлатларда энди касалланишлар динамикаси ортга қайта бошлади.
ЖССТнинг навбатдаги баёнотида келтирилишича, ўтган ҳафтада дунёда коронавирусга чалиниш ҳолатлари 19 фоизга камайди. Яъни 7-13 февраль саналари оралиғида СOVID-19ни юқтирганлар сони 16 миллион нафарга яқинлашди.
Таҳлиллар шуни кўрсатадики, пандемия даври бошланганидан буён унинг энг юқори чўққиси шу йил январь ойи сўнгги ҳафтасида кузатилди. Бу даврда 22 миллион нафардан ортиқ кишига коронавирус ташхиси қўйилди.
Февраль ойидан эса вазият яна ўнглана бошлади. Хусусан, ўтган ҳафтада Шарқий Осиё ва Океания мамлакатларидан ташқари деярли барча ҳудудларда касалланишлар сони камайди.
Масалан, АҚШда 10 январь куни 1,4 миллиондан зиёд кишида СOVID-19 инфекцияси аниқланиб, антирекорд қайд этилган бўлса, кейинги кунларда бу рақамлар қарийб 10 баробардан зиёд пасайган.
Ҳиндистонда ҳам бундан бир ой аввал кунига 300 минг атрофида бемор рўйхатга олинаётганди. Ҳозирга келиб суткалик ҳолатлар ўртача 30 мингтани ташкил этмоқда. Буюк Британия, Франция, Италия, Испания каби қатор Европа мамлакатлари ҳақида ҳам шундай хулосаларни айтиш мумкин.
Аммо бу ҳали хотиржамлик учун асос бўла олмайди. Чунки айрим давлатларда касалланишлар авж олмоқда. Россия, Япония, Жанубий Корея, Грузия шулар сирасидан.
Қолаверса, ЖССТ “омикрон”нинг субварианти ҳисобланган BА.2 мутацияси кенг тарқалаётганидан жиддий хавотирда. Чунки пандемия тўлқини пасаяётган бир пайтда янги турдаги мазкур инфекция билан касалланиш ҳолатлари ортиб боряпти.
Статистик маълумотларга кўра, айни пайтда дунё бўйича “омикрон”га чалинаётган ҳар беш нафар бемордан бири BА.2 мутациясини юқтирмоқда. Бу эса эмаланиш жараёнини сусайтирмаслик, аксинча янада кучайтириш лозимлигини англатади.
