Россия президенти Владимир Путин Донецк ҳамда Луганск Халқ Республикасини тан олишини айтиб, фармонга имзо чекди.
Европа иттифоқи ушбу фармон имзоланишини халқаро ҳуқуқ қоидаларига зид ва Украинанинг ҳудудий яхлитлигига таҳдид деб атади. Россиянинг ушбу қарорига қарши ўта қаттиқ жавоб қайтарилишини ваъда қилишмоқда.
Туркия ҳам бу борада ўзининг муносабатини эълон қилди.
"Россия Федерациясининг гўё Донецк ва Луганск республикаларини тан олиш тўғрисидаги қарори Минск келишувларига зид, шунингдек, Украинанинг сиёсий бирлиги, суверенитети ва ҳудудий яхлитлигини очиқдан-очиқ бузиш ҳисобланади.
Биз Россиянинг бу қарорини номақбул деб атаймиз ва уни рад этамиз.
Фурсатдан фойдаланиб, Украинанинг сиёсий бирлиги ва ҳудудий яхлитлигини сақлашга содиқлигимизни таъкидлаймиз ҳамда барча томонларни адолатли фикр юритишга ва халқаро ҳуқуқни ҳурмат қилишга чақирамиз", – дейилади Туркия Ташқи ишлар вазирлиги берган баёнотда.
