Бундан бир неча ой муқаддам Наманган вилояти Давлатобод тумани Юксалиш массивида аёл ва эркак тортишуви сабаб "Malibu-2" автомашинаси ёқиб юборилгани ҳақида хабар бергандик.
Воқеа 2021 йилнинг 13 ноябрь куни соат 4:00ларда Наманган вилояти Давлатобод туманида яшовчи 1989 йилда туғилган аёлнинг яшаш уйи олдида юз берган.
Мазкур холат юзасидан Давлатобод тумани ИИБ ҳузуридаги ТБ томонидан терговга қадар текширув харакатлари олиб борилиб, жиноят иши қўзғатилган эди.
Жиноят ишида тўпланган хужжатлар Жиноят ишлари бўйича Наманган шаҳар судига хавола қилинди. Суд иши натижаларига кўра, жиноятчи айбдор деб топилиб, қамоққа олинди. Бу ҳақда "Даракчи"га Жиноят ишлари бўйича Наманган шахар суди судяси Элёр Пирматов маълумот берди:
"2022 йилнинг 24 январдаги қарорига кўра Ўзбекистон республикаси Жиноят Кодексининг 173-моддаси 2 қисми "В " банди билан айбланган фуқаро Игамбердиев Олим Исаковичга нисбатан жиноят иши кўриб чиқилиб, шу куни ҳукм эълон қилинди. Айбланувчи томонидан фуқаронинг Малибу русумли автомашинасини ёқиб юбориши натижасида етказилган 231 миллион сўм моддий зарар масаласида иш кўриб чиқилди. Жазо тайинлашда судланувчининг айбига иқрорлиги, пушаймонлиги, оилавий моддий шароитлари эътиборга олинди. Бироқ иш бўйича етказилган моддий зарар қопланмаганлигини, жабрланувчининг давоси борлиги инобатга олиниб, айбланувчига 2 йил муддатга озодликдан маҳрум қилиниш жазоси тайинланди. Унга нисбатан қўлланилгам эҳтиёт чораси бекор қилиниб, у қамоққа олинди."
