Жорий йилнинг 17 февраль куни соат 12:30 ларда номаълум шахс Яшнобод тумани Авиасозлар 1-даҳасида жойлашган уйларнинг бирида, иккинчи ва учинчи қаватлар зинапояси йўлагида туриб олиб, ушбу зинапоядан, ўзини уйига кириш учун кўтарилаётган 73 ёшли В.П.ни тўхтатиб, унга куч ишлатиши билан қўрқитиб, қўлида бўлган сумкасини талончилик йўли билан тортиб олиб, ҳодиса жойидан яширинган. Бу ҳақда ИИВ ҳузуридаги Тергов департаменти маълум қилди.
Олиб борилган тергов-тезкор ҳаракатлари натижасида, мазкур жиноятни Тошкент вилоятида яшовчи 18 ёшли К.Ш. содир этганлиги аниқланган.
Мазкур ҳолат юзасидан Яшнобод туман ИИО ФМБ ҳузуридаги тергов бўлими томонидан К.Ш.га нисбатан Ўзбекистон Республикаси Жиноят кодекснинг 166-моддаси 2-қисми “а” банди (талончилик) билан жиноят иши қўзғатилган.
Ҳозирда юқоридаги шахс нима сабабдан талончиликка қўл урганлиги аниқланмоқда.
