Бугун, 24 февраль куни Украина президенти Владимир Зеленский мавжуд ҳолат юзасидан Россия фуқаролари ва Евроиттифоқ раҳбарларига мурожаат қилди.
-Россия фуқаролари: Агар бизни эшитётган ва урушга қарши бўлсангиз, ўз шаҳрингиз майдонига чиқинг!
-Европа раҳбарлари: Агар сиз бугун бизга ёрдам бермасангиз, эртага уруш сизнинг эшигингизни тақиллатади!
У украиналикларни ваҳимага берилмасликка чақирди. Зеленский ўз мурожаатида Россия президенти Владимир Путин билан музокаралар муваффақиятсиз якунланганини билдирди:
«Мен Россия Федерацияси президенти билан телефон орқали мулоқот қилиш ташаббуси билан чиқдим. Натижа: жимлик», - деди Зеленский.
Зеленский Россия ҳар куни «Европада йирик уруш» бошлаши мумкинлиги ҳақида қатъий огоҳлантирди ва русларни бунга қарши туришга ундади.
Унинг айтишича, Россия Украина чегараларида деярли 200 минг аскар ва минглаб жанговар техникаларни жойлаштириб улгурган.
Украина ҳудудида ҳаво йўллари чекланган. Бугун, 24 февраль куни эрталаб Украина ҳукумати «потенциал хавф» туфайли ўз ҳаво ҳудудида фуқаролик парвозларини чеклаганини айтди. Маълум қилинишича, самолётлар беихтиёр уриб туширилиши ёки киберҳужумларга дучор бўлиш хавфи бор.
Бу билдиришнома фуқаролик парвозларини тўғридан-тўғри тақиқлашми ёки йўқ, ҳозирча аниқ эмас.
ОАВ маълумотларига кўра, Россия фуқаролик авиациясини ҳам Украинанинг Россия билан чегарадош бўлган шарқий ҳаво ҳудудини ёпаётгани ҳақида огоҳлантирган.
Жорий ҳолатдан ҳимояланиш мақсадида Украина мамлакат бўйлаб қатъий 30 кунлик фавқулодда ҳолат эълон қилди ва Россияда яшовчи миллионлаб фуқароларини ўз уйларига қайтишга чақирди. 30 кунлик фавқулодда ҳолат хавфсизлик чораларини кучайтириш, жумладан, комендантлик соати жорий этишдан иборат.
Бир қанча ғарб давлатлари Россия 2014-15 йилларда Украина шарқи бўйича тузилган тинчлик битимини бузгани ва Луганск ва Донетск халқ республикаларини мустақил давлатлар сифатида тан олганидан сўнг Россияга қарши қатор санкциялар эълон қилган. Москванинг қўшинлар «тинчликпарварлик» амалиётларига юборилиши ҳақидаги даъволари БМТ Бош котиби томонидан рад этилган ва Ғарб томонидан сафсата, деб баҳоланган.
Россия сўнгги саккиз йилдан бери Украина шарқидаги қонли қуролли исённи қўллаб-қувватлаб келади. Ўшандан бери жангларда 14 000 га яқин одам, жумладан кўплаб тинч аҳоли вакиллари ҳалок бўлди.
АҚШ Москванинг ҳаракатларини босқиннинг бошланиши сифатида баҳолади. Кеча, 23 февраль куни АҚШ мудофаа вазирлиги вакили рус қўшинлари томонидан ҳар қандай вақтда кенг кўламли босқин бўлиши мумкинлигини ва Россиянинг ҳужумкор ҳаракатлари анчадан бери кучайиб бораётганини айтди.
