Туркия Босфор ва Дарданел буғозини ҳарбий кемалар учун ёпиши мумкин, лекин ушбу вазиятда ҳам РФ флотини базаларига қайтаришда ушбу ҳудуддан ўтишга ҳақли. Бу ҳақда Туркия ташқи ишлар вазири Мавлуд Чавушўғли маълум қилди.
"Украина бизга расман сўров жўнатди (Россия ҳарбий кемалари учун буғозни ёпиш бўйича). Монтрё Конвенция бандларида аниқ-тиниқ қилиб ёзиб қўйилган. Шу кунгача Туркия Монтрё Конвенциясига иккиланмай амал қилиб келмоқда. Туркия урушда иштирок этмаётган, лекин унда қатнашаётган томонларга нисбатан чора кўриши ва Туркия ҳарбий кемаларнинг ўтишини чеклаши мумкин. Бироқ Монтрё Конвенцияси урушда иштирок этган томонларнинг ҳарбий кемалари ўз базаларига қайтиши мумкинлигини ҳам назарда тутади ва шундай экан, уларга рухсат берилиши керак", – дея келтиради вазирнинг гапларини Hürriyet газетаси.
Маълумот учун, кеча 24 февраль куни Украина президенти Туркиядан Россия кемалари учун босфор бўғозини ёпишни сўраган эди.
