Аввалроқ, афсонавий спортчи Оксана Чусовитина Дохадаги Жаҳон кубогида олтин медални қўлга киритгани ҳақида хабар берган эдик. Шу муносабат билан бир қатор таниқли шахслар спортчига самимий табриклар йўлламоқда.
Масс-медиа фонди Васийлик кенгаши раиси ўринбосари Саида Мирзиёева:
– "Мен спортдаги фаолиятимни Ўзбекистон шарафи учун медаль қозонмасдан якунлай олмайман" - дея берган ваъдангиз ёдимизда, Оксана Александровна!
Сиз ваъдангизни бажардингиз, мамлакатга олтин медаль олиб келдингиз. Сизни Доҳада бўлиб ўтган Жаҳон Кубогининг иккинчи босқичида ғолиб бўлганингиз билан чин юракдан табриклайман! Спорт гимнастикаси бўйича жамоамизни табриклайман!
Сизнинг ғалабангиз нафақат спортдаги ютуқ, балки, шубҳасиз қатъият, ирода ва ватанпарварлик намунасидир.
Раҳмат сизга, Great Chuso! Сиз Ўзбекистоннинг ва дунёнинг буюк спортчисисиз, бундан кейинги ғалабаларингизни интизорлик билан кутиб қоламиз!
Бундан ташқари Германиянинг Ўзбекистондаги элчихонаси Чусовитинани бир пайтлар Германия учун медал ютиб берганини эслаб, ундан фахрланишини айтди.
– Германиянинг Тошкентдаги элчихонаси гимнастикачи Оксана Чусовитинани Доҳадаги Жаҳон кубогининг иккинчи босқичида олтин медални қўлга киритгани билан табриклайди.
Биз Чусовитинанинг Ўзбекистон Республикаси учун эришаётган ютуқларидан ҳурсандмиз. Шу билан бирга, биз Оксана бир неча йил Германия Федератив Республикасида 🇩🇪 яшаганидан ва шу вақт мобайнида Германия учун гимнастика бўйича ажойиб ғалабаларни қўлга киритганидан, масалан, 2008 йилдаги Олимпия ўйинларининг кумуш медалидан жуда фахрланамиз.
Германия ва Ўзбекистон ўртасида ўрнатилган дипломатик алоқаларнинг 30 йиллиги муносабати билан Оксананинг спортдаги муваффақиятлари Германия ва Ўзбекистон ўртасидаги яқин муносабатларнинг рамзи ҳисобланади.
Германия элчихонаси Оксана Чусовитинага ҳаёт йўлида катта муваффақиятлар, бахт ва соғлик тилайди.
