8 март ҳар бир аёл эътибор кутадиган кун, шубҳасиз. Она, рафиқа, устозлар-у амма-холаларгача гўзал дил изҳорлари билдирилади.
“Даракчи” газетаси ва “darakchi.uz” сайти ижодкорлари 8 март арафасида жамиятимизнинг турли соҳаларида фаолият юритаётган энг фидоий аёлларни табриклаб, уларнинг қуйидаги икки савол атрофидаги мулоҳазаларини эшитишни мақсад қилди.
1. Байрамлар сизнинг ҳаётингизда қанчалик аҳамиятга эга?
2. Жамиятимизда аёлларнинг ўрнини қандай баҳолайсиз?
“ШУ КУНЛАРГА ЕТГАНЛАР УЧУН ОМАД!”
Сайёра САИДИНОМОВА,
81-сонли ИДУМ директор ўринбосари,
“Халқ таълими аълочиси”:
— Албатта, байрамни севмайдиган инсон бўлмаса керак. Чунки байрам бу хурсандчилик дегани, бу бахт дегани. Бу кунларга етганлар учун бу омад дегани. Шунинг учун мен байрамларни жуда яхши кўраман. Айниқса, 2 сентябрь — “Билимлар куни” биз ўқитувчилар учун энг катта байрам ҳисобланади. Ўша куни узоқ таътилдан қайтган болажонларимиз билан кўришамиз. Мустақиллик дарсларини ўтамиз. Ҳаммада кўтаринки кайфият. Ўқувчилар ҳам, биз ҳам кучга тўлиб, бир-биримизни соғиниб, мактабни, дарсларни соғиниб чиққан кунимиз бўлади. Ўша куни ўзимизни худди узоқ вақт кўришмаган қадрдонларимиз билан дийдорлашгандек ҳис қиламиз.
— Чинданам бугунги кунда барча соҳаларда, турли тизимларда аёлларнинг нуфузи ошиб бораётганига гувоҳ бўляпмиз. Сабаби, аёлларимиз ҳам ўзининг салоҳиятли эканлигини кўрсата олишмоқда. Мисол учун, чет элда ҳам турли касбларда фаолият юритаётган аёлларимиз бор. Хорижда таълим олиб келаётган хотин-қизларимиз бор.
Умуман, ҳар бир аёл бугун ўқиб-ўрганишда, изланишда, десам муболаға бўлмайди. Мен ўйлайманки, оиланинг тинч бўлиши ҳам, қайсидир маънода оиланинг мустаҳкам бўлиши ҳам аёлларга боғлиқ. Хотин-қизларимизнинг билимли, илмли бўлгани оиланинг келажаги, нафақат оиланинг, балки жамиятнинг келажаги ҳисобланмиш фарзандларни тарбиялашда жуда қўл келади. Агар аёл ўзи кенг дунёқарашга эга бўлса, эртага юрт учун худди шундай авлодни тарбиялаб бера олади, назаримда. Шу ўринда имкони бўлса, барча аёлларимизни байрам билан табрикламоқчиман. Уларни соғлик-саломатлик ва гўзаллик тарк этмаслигини тилайман.
