АҚШнинг Ўзбекистондаги элчиси Дениел Розенблюм Наврўз муносабати билан ўзбек халқини табриклади. Розенблюмнинг ўзбек тилида билдирган табриги элчихонанинг ижтимоий тармоқлардаги саҳифаларида эълон қилинди.
"Ассалому алайкум, азиз дўстлар! Америка Қўшма Штатлари халқи номидан барчангизни баҳор байрами Наврўз билан табриклайман. Ўзбекистонга баҳор келар экан, об-ҳаво ва табиат янда гўзаллашиб кетади. Бу эса баҳор келганини байрам қилиш учун жуда қулай фурсатдир", — дейди у табригида.
Элчи ўтган йили Наврўздан кейинги давр мураккаб кечганини, аммо фарзандларга фаровон келажак барпо этиш учун ишлашда давом этиш шартлигини, у мустаҳкам соғлиқ ва тинч ҳаёт кечириладиган келажак бўлиши кераклигини таъкидлади.
"Барчангизга соғлиқ, давомли тинчлик ва мўъжизаларга бой баҳор тилайман. Наврўз айёмингиз муборак бўлсин", — дея табригига якун ясаган Дениел Розенблюм.
