Покистон бош вазири Имрон Хон мамлакат парламенти тарқатиб юборилганидан кейин бош вазирлик лавозимидан четлаштирилди, бироқ бу лавозимда вақтинчалик бош вазир тайинлангунга қадар давом этади. Бу ҳақда Риа Новости хабар қилди.
“Покистон Президенти томонидан Покистон Ислом Республикаси Конституциясининг 48-моддаси 1-қисми билан биргаликда 58-модданинг 1-бандига мувофиқ, Покистон Президенти томонидан Миллий Ассамблеяни тарқатиб юбориши натижасида Имрон Хон ўз фаолиятини дарҳол тўхтатди”, - дейилади мамлакат вазирлар маҳкамаси хабарида.
Шу билан бирга, Покистон президенти Ориф Алвига кўра, Хон муваққат бош вазир тайинлангунга қадар бу лавозимда қолади.
“Имрон Аҳмадхон Ниёзий Покистон Ислом Республикаси конституциясининг 224-моддаси “А”(4) бандига мувофиқ, муваққат бош вазир тайинлангунга қадар бош вазир бўлиб қолади”, — деб ёзди Покистон президенти твиттердаги саҳифасида.
Маълум қилинишича, Покистон президенти бош вазирнинг таклифига биноан мамлакат парламентини тарқатиб юборди. Бу парламент спикери ўринбосари Қосим Сури бош вазирга ишончсизлик вотумини рад этиб, уни конституциянинг 5-моддасига зид деб атаганидан кўп ўтмай содир бўлди. Ишончсизлик вотумини бекор қилиш қарори мухолифат партияларини ғазаблантирди ва улар бу қарорга суд орқали эътироз билдиришларини айтди.
Покистонда 90 кундан кейин янги парламент сайловлари бўлиб ўтади.
