Ижтимоий тармоқларда мактаб ўқитувчиси ўқувчи қизни калтаклагани акс этган видео тарқалди. Ушбу ҳолат юзасидан Даракчи сайтига Андижон вилояти Асака тумани ҳокимлиги қуйидагича муносабат билдирди.
Аниқланишича, ҳодиса жорий йилнинг 2 апрель куни тумандаги 38-умумтаълим мактабида дарс тугаши пайтида 10-А синфида содир бўлган.
Ўқитувчи ва ўқувчилар ўзаро келишмовчилик юзага келган. Бунга ўқувчиларнинг ҳеч қандай сабабларсиз кетма-кет икки кун дарсдан қочиб кетиши ва дарс жараёнларига қатнашмаётгани сабаб бўлган.
Ўрганиш давомида эса ўқитувчи Р.Д. ва ўқувчилар И.С., М.М., Ш.З. ва Б.Ў. муросага келтирилган.
“Айни пайтда улар ўртасида ҳеч қандай адоват мавжуд эмас. Ўқитувчи ишчи гуруҳ томонидан ҳам одоб-ахлоқ нормаларига қатъий риоя қилиши тўғрисида жиддий огоҳлантирилди. Келгусида бундай ҳолатга йўл қўймаслик хар қандай масалани вазминлик билан ҳал этилиши тўғрисида тушунтириш ишлари олиб борилди.
Ўқувчиларнинг ота-оналари билан ҳам суҳбат олиб борилиб, фарзандларини доимий дарс жараёнларига қатнашишини назорат қилишлари тўғрисидан тушунчалар берилди”, дейилади муносабатда.
