2022 йил 18 апрель куни жиноят ишлари бўйича Шайхонтоҳур туман судида К. Раббимов (1977 йилда Самарқанд вилоятида туғилган) ва Ш. Самандаров (1997 йилда Навоий вилоятида туғилган) га нисбатан маъмурий ҳуқуқбузарлик тўғрисидаги иш кўриб чиқилди. Бу ҳақда Тошкент шаҳар суди хабар берди.
Аниқланишича, 2022 йил 17 апрель куни К. Раббимов ва Ш. Самандаров Тошкент савдо маркази (Шайхонтоҳур тумани) олдидаги жамоат жойида шовқин қилиб туришган вақтда шу ерда хизмат олиб бораётган ички ишлар органлари ходимлари келиб, уларнинг шахсини аниқлаш мақсадида ИИБ биносига таклиф қилишганда, уларга қаршилик кўрсатиб, ички ишлар органлари ходимларининг қонуний талабларини бажармасдан, уларни омма олдида ҳақорат қилишган.
Ҳуқуқбузарлар К. Раббимов ва Ш. Самандаровнинг ҳаракатлари ишда мавжуд тўпланган далиллар, жабрланувчи З. Турсуновнинг аризаси, гувоҳларнинг тушунтириш хатлари ва бошқа ҳужжатлар билан ўз тасдиғини топган.
Суднинг қарорига кўра:
К. Раббимов МЖтКнинг 183-моддаси (майда безорилик), 194-моддаси (ички ишлар органлари ходимининг қонуний талабларини бажармаслик) 1-қисми ва 195-моддаси (ички ишлар органлари ходимларининг ўз хизмат бурчларини бажаришларига қаршилик кўрсатиш) да назарда тутилган маъмурий ҳуқуқбузарликларни содир этган деб топилиб, унга 15 сутка маъмурий қамоқ жазоси тайинланди.
Ш. Самандаров МЖтКнинг 194-моддаси 1-қисмида назарда тутилган ҳуқуқбузарликни содир этган деб топилиб, унга базавий ҳисоблаш миқдорининг бир баравари миқдорида жарима жазоси тайинланди.
Ушбу қарор устидан К. Раббимов томонидан келтирилган апелляция шикояти 18 апрель куни Тошкент шаҳар судининг жиноят ишлари бўйича судлов ҳайъати апелляция инстанциясида кўриб чиқилиб, К. Раббимовга нисбатан чиқарилган суд қарори ўзгартирилди.
Қарорга кўра, К. Раббимовга узил-кесил базавий ҳисоблаш миқдорининг 2 баравари миқдорида жарима жазоси тайинланиб, апелляция шикояти қаноатлантирилди.
Қарорнинг қолган қисми ўзгаришсиз қолдирилди.
Шундан сўнг, сиёсатшунос Камолиддин Раббимов ижтимоий тармоқдаги саҳифасида пост қолдирди. Унда, ўзининг айби борлигини ва энди белгиланган жаримани тўлашини айтиб, фуқаролардан ушбу вазиятни сиёсийлаштирмасликларини сўради.
