Соғлиқни сақлаш вазири ўринбосари Элмира Боситхонова спинал мушак атрофияси касаллигининг олдини олиш, уни эрта босқичларда аниқлаш ва самарали даволаш бўйича белгиланган вазифалар ҳақида ҳам тўхталиб ўтди.
— Мамлакатимизда бу хасталикка чалинган беморлар учун зарур дори, реабилитация ва махсус озуқа воситалари давлат бюджети ҳисобидан харид қилинмаганлиги ҳамда беморларда фақатгина симптоматик муолажа ўтказилгани сабабли касаллик оғир кечиб, эрта ўлим билан якунланаётган эди, — дейди Э.Баситханова.
— Президентимизнинг “Спинал мушак атрофияси ташхиси қўйилган бемор болаларга тиббий-ижтимоий ёрдам кўрсатиш ва дори воситаларини бепул етказиб бериш тизимини ташкил этиш чора-тадбирлари тўғрисида”ги қарори қабул қилиниши билан бундай муаммолар ечимини топадиган бўлди.
Жумладан, энди спинал мушак атрофияси ташхиси қўйилган бемор болалар давлат томонидан патогенетик дорилар, ортопедия мосламалари ва реабилитация воситалари билан таъминланади.
Хавф гуруҳидаги ҳомиладор аёллар Она ва бола скрининг марказларида ва Миллий референс лабораторияларида бепул диагностикадан ўтказилиб, уларни даволаш стратегияси белгиланиши ҳам катта янгилик.
Шунингдек, қарорда 2022 йил 1 июлдан бошлаб никоҳланувчилар ўз ҳисобидан Аҳоли репродуктив саломатлик марказининг филиаллари орқали молекуляргенетик тестдан ўтиши қайд этилган.
Республика Она ва бола скрининг маркази ҳамда унинг ҳудудий бўлимларида спинал мушак атрофияси диагнозига эга бўлган оилаларнинг электрон Ягона миллий регистри юритилиши ҳам ижобий натижа бериши, шубҳасиз.
Бундан ташқари, шу йил 1 майдан бошлаб спинал мушак атрофияси касаллиги бўлган бемор болалар реабилитацияси учун У.Қурбонов номидаги Республика болалар руҳий-асаб касалликлари шифохонасида 10 та стационар ўрин ташкил этилмоқда.
Ҳудудлардаги болалар кўп тармоқли тиббиёт марказларида мультидисциплинар (невролог, педиатр, реаниматолог, пульмонолог, ортопед, хирург) текширув ҳамда даволаш (оператив контрактуралар ва суяк деформацияларини тўғрилаш) жараёни йўлга қўйилади.
Тиббий-ижтимоий хизматларни ривожлантириш агентлиги томонидан 2022 йил 1 июндан бошлаб уй шароитида даволанаётган бемор болаларга зарур бўлган техник (15 турдаги) воситалар бепул ижарага берилади.
Шунингдек, Соғлиқни сақлаш вазирлиги ҳузурида Спинал мушак атрофияси ташхиси қўйилган бемор болаларни қўллаб-қувватлаш жамғармаси ташкил қилиниши маблағ масаласида қийналаётган беморларнинг яқинлари учун чинакам кўмак бўлди.
