“Қазақстан темiр жолы” MK”АЖ билан келишилган ҳолда темир йўлларда йўловчи ташишлар қайта йўлга қўйилмоқда.
Аввал хабар берганимиздек, жорий йилнинг 15-май куни 647/648-сонли “Нукус—Бейнеу—Нукус” йўналишидаги йўловчи поездининг қатнови бошланди.
2022-йил 16 майдан бошлаб, “Олма-ота-2 – Тошкент – Олма-ота-2” йўналишида 1/2-сонли “Тулпар-Талго” поездининг қатнови қайта тикланди.
2 ярим йиллик танаффусдан сўнг илк бор Ўзбекистонга қараб йўл олган ушбу поезд бугун соат 11 дан 05 дақиқа ўтганда Тошкент Марказий темир йўл вокзалига кириб келди. Таркиби 24 та йўловчи вагондан иборат бўлган ушбу поезд бир томонга ҳаракатланганда 425 нафар йўловчини ўз манзилига етказиб қўйиш имкониятга эга.
Барча қулайликларга эга бўлган мазкур поезд ҳаракат жадвалига кўра ҳафтанинг душанба, чоршанба ва шанба кунлари “Олма-ота-2 темир йўл вокзалидан соат 18:32 да, шунингдек, ҳафтанинг сейшанба, пайшанба ҳамда якшанба кунлари соат 12:39 да – Тошкент марказий темир йўл вокзалидан ҳаракатини амалга оширади.Чипталарни электрон тарзда ҳамда темир йўл кассаларидан сотиб олиш мумкин. Йўловчилар электрон чипталарни сотиб олаётганда, Қозоғистон Республикасининг давлат чегарасидан ўтиш учун уни А4 форматидаги қоғозга чиқариш (чоп этиш) лозим.
Маълумотларга кўра, йўловчилар Қозоғистон Республикаси ва мамлакатимиз давлат чегараси орқали ўтиш пунктларида белгиланган тартибда ўрнатилган чеклов чоралари талабларига риоя қилишлари шарт. Хусусан, Қозоғистон Республикаси давлат чегараси ўтиш пунктлари орқали Қозоғистон Республикасига келган барча шахслар ПЗР усули билан CОVID-19 га тест синовидан ўтганлиги ҳақида маълумотнома тақдим этишлари шарт (қозоқ, рус ёки инглиз тилида). Мазкур маълумотнома Қозоғистон Республикаси давлат чегарасидан ўтишдан олдин камида 72 соатдан кўп бўлмаган муддатда бўлиши зарур.
Мутахассисларнинг сўзларига кўра, бошқа қўшни давлатлар билан ҳам темир йўл йўналишларининг қайта тикланиши борасида музокоралар олиб борилмоқда. Томонларнинг келишувига асосан босқичма- босқич бошқа давлатларга ҳам поездлар қатнови қайта тикланиши кўзда тутилган.
