Покистон Саудия Арабистонига 8 минг нафар ҳарбий хизматчи, қирувчи самолётлар эскадрильяси ҳамда ҳаво ҳужумидан мудофаа тизимини жўнатди. Бу ҳақда Reuters ҳукумат манбаларига таяниб хабар берди.
Маълум қилинишича, Исломобод янги ҳужумлар юз берган тақдирда Саудия Арабистони Қуролли кучларини қўллаб-қувватлаш мақсадида катта жанговар кучларни сафарбар қилган.
Reuters суҳбатдошларига кўра, Покистон ва Саудия Арабистони ўртасидаги ўзаро мудофаа шартномаси томонларни ҳужум ҳолатида бир-бирига ёрдам беришга мажбур қилади. Покистон мудофаа вазири Хаважа Муҳаммад Асиф аввалроқ бу келишув Саудия Арабистонини Покистоннинг “ядровий соябони” остига қўйишини айтган эди.
Манбаларнинг билдиришича, Покистон апрель ойи бошида Саудия Арабистонига 16 тага яқин самолётдан иборат тўлиқ эскадрилья юборган. Улар асосан Хитой билан ҳамкорликда ишлаб чиқарилган JF-17 қирувчи самолётларидан иборат. Шунингдек, икки дрон эскадрильяси ҳам жўнатилган.
Бундан ташқари, Саудия Арабистонига Хитойнинг HQ-9 ҳаво ҳужумидан мудофаа тизими етказиб берилган. Барча ускуналарга покистонлик ҳарбийлар хизмат кўрсатмоқда ва харажатлар Саудия томонидан қопланмоқда.
Қайд этилишича, Саудия Арабистонига юборилган покистонлик ҳарбийлар асосан маслаҳат ва ўқув вазифаларини бажаради. Манбалардан бирига кўра, қўшма шартнома доирасида мамлакатда 80 минг нафаргача покистонлик ҳарбий ва ҳарбий кемалар жойлаштирилиши мумкин.
Аввалроқ Financial Times Саудия Арабистони Яқин Шарқ давлатлари ва Эрон ўртасида ҳужум қилмаслик пактини таклиф қилгани ҳақида хабар берган эди. Нашрга кўра, бунда Совуқ уруш даврида Европада кескинликни юмшатган Ҳелсинки келишувлари намуна сифатида кўрилмоқда.
