Айни кунларда Англиянинг Манчестер шаҳрида пара таеквондо бўйича Европа Очиқ чемпионати бўлиб ўтмоқда.
Пара таеквондо бўйича Европа чемпионати илк бор 1976-йилда Испаниянинг Барселона шаҳрида ўтказилган бўлиб, мусобақалар ҳар икки йилда бир марта, Европа таеквондо иттифоқи, шунингдек, Жаҳон таеквондосининг континентал филиали томонидан ташкил этилади.
2022-йилда ташкил этилаётган 24-пара таеквондо чемпионатида аёллар ҳамда эркаклар 49 кгдан 87 кггача ва 87 кгдан юқори вазн тоифаларида баҳслашадилар.
Мазкур мусобақада Ўзбекистондан ҳам спорт делегацияси иштирок этаётган бўлиб, аёллар ўртасида +65 кг вазн тоифасида бўлиб ўтган жангларда ҳамюртимиз Гулжаной Наимова Туркия, Сербия ва Испаниялик спортчикларни мағлубиятга учратган ҳолда олтин медалга сазовор бўлди.
Таъкидлаш лозимки, Гулжаной ушбу ғалабадан сўнг Париж-2024 ёзги Паралимпия ўйинлари учун 20 рейтинг очкосини ўз ҳисобига ёздириб қўйди. Бундан ташқари у ўз вазн тоифасида дунё рейтингида пешқадамликни ҳам сақлаб қолди.
